Qazaqtyń ulynyń esimi ulyqtaldy
El Táýelsizdiginiń 30 jyldyq merekesi qarsańynda Arys qalasynda kórnekti memleket jáne qoǵam qaıratkeri Dinmuhammed Qonaevtyń bústi ornatyldy, dep habarlaıdy Almaty-akshamy.kz QazAqparatqa silteme jasap.
Aıtýly sharaǵa qala ákimi Gúljan Qurmanbekova, zıaly qaýym ókilderi jáne qaıratkerdiń inisi Dıar Qonaev qatysty, dep habarlaıdy QazAqparat Túrkistan oblysynyń Óńirlik komýnıkasıalar qyzmetine silteme jasap. Jıynda qala ákimi halyqtyń júreginen oryn alǵan azamattyń Arys qalasyna sińirgen eńbegine toqtaldy.
«Qazaq SSR Joǵarǵy Keńesiniń 1956 jylǵy 31 shildedegi Jarlyǵymen Arys qala mártebesine ıe bolǵany belgili. Minekeı, týra 65 jyl buryn osy Jarlyqtyń kúshine enýine Dinmuhamed Ahmetuly aıryqsha yqpal etkeni aqıqat. Biz búgin el ıgiligi úshin eren eńbek etken erlerdiń esimin ulyqtap, keıingi urpaqqa úlgi etý maqsatynda osyndaı saltanatty sharada bas qosyp turmyz. Bul - biz úshin zor mártebe», - dedi Gúljan Mamytqyzy.
Aıta keteıik, ult maqtanyshynyń beınesi aıshyqtalǵan músindi Arys qalasynyń týmasy, Sýretshiler odaǵynyń múshesi Tileýberdi Bınashev syıǵa tartty.