Almaty qalasy «Erte aralasý áleýmettik qyzmetter ortalyǵy» balalar men olardyń qamqor otbasy úshin jyly atmosferaǵa toly «Árqashan kún sónbesin!» atty ınklúzıvti mereke uıymdastyrdy. İs-shara ortalyq aýmaǵynda ótti.
Balalar meıramynda erekshe balalardyń emin-erkin oınap kúlýine, damytý, qoldaý is-sharalaryna túgel qatysýyna mán berildi. Naqtyraq aıtsaq, búldirshinderge arnalǵan ınteraktıvti aımaq, túrli-tústi bormen asfáltqa sýret salý, damytýshy oıyndar, anımatorlardyń óner kórsetýi men mýzykalyq nómirler uıymdastyryldy.
Sondaı-aq, ortalyq mamandary ata-analarǵa erte jastaǵy damý kidiristerin anyqtaý men túzetý týraly keńes beretin burysh uıymdastyrdy.
_”Ár bala, óz ereksheligine qaramastan, baqytty kúnder keshýge jáne tolyqqandy balalyq shaqqa quqyly. Bizdiń ortalyqtyń maqsaty — otbasylarǵa ýaqytyly qoldaý kórsetý, bolashaqqa degen senimin ústeı túsý”, – deıdi Almaty qalasy Erte aralasý ortalyǵynyń dırektory Nurzıa Álimbekova.
İs-sharaǵa ortalyqtyń seriktes-demeýshisi – Qazaq geografıalyq qoǵamy men «SAM» kompanıasy úlken qoldaý kórsetti. Balalarǵa túrli oıynshyq, táttiler kótere kelgen Qazaq geografıalyq qoǵamynyń qyzmetkeri Dáýlet Omarov jáne «SAM» kompanıasynan Sáýle Qadyrbaeva men Álisher Anarqulov sóz sóılep, baldyrǵandarǵa baqyt, shattyq, densaýlyq tiledi.
Bul mereke balalarǵa qýanysh syılap qana qoımaı, qoǵamnyń erte aralasý men ınklúzıanyń mańyzdylyǵyn túsinýine de yqpal etkeni sózsiz.
Mereke qamqorlyq pen qýanyshqa toly atmosferada ótti. Bala da, onyń ata-anasy da dán rıza boldy.