15-25 tamyz aralyǵynda Moldova Respýblıkasynyń astanasy Kıshınevte armrestlıngten 45-shi álem chempıonaty ótti, dep habarlaıdy aqshamnews.kz.
Bıylǵy dodaǵa 61 memleketten 1500-ge jýyq sportshy qatysty. Bul qatarda jasóspirimder, jastar, eresekter, ardagerler jáne para atletter bar.
Bul qatarda elimizdiń 150 qol kúresiniń sheberi bar. Olar 82 altyn, 92 kúmis, 82 qola júldemen (barlyǵy 256) jalpy esepte 1-oryn aldy. Ekinshi orynǵa Túrkıa, úshinshi orynǵa Grýzıa jaıǵasty.
Otandasymyz Nurdáýlet Aıdarhan Kıshınevte eresekter arasynda 7 dúrkin (oń qolda altyn, sol qolda kúmis), jastar arasyndaǵy nátıjesin qosqanda 12 dúrkin álem chempıony atandy. Sonymen qatar Moldovada Meırambek Ersaıyn 7 dúrkin, Erdáýlet Nurmahan 5 dúrkin álem chempıony ataǵyna qol jetkizdi.
Eske sala keteıik, byltyr armrestlıngten álem chempıonaty Almaty qalasynda ótken. 52 eldiń 1000-nan astam sportshysy bas qosqan básekede Ulttyq quramanyń 256 ókili júldege talasqan. Ol kezde Qazaqstan komandasy 72 altyn, 57 kúmis, 27 qola medalmen jalpy esepte top jarǵan.
Al 2022 jyly Túrkıanyń Antalá qalasyndaǵy álem chempıonatynda 54 elden 1700 sportshy bas qosqan. Qazaqstan 68 altyn, 66 kúmis pen 36 qola júldemen jalpy esepte 1-oryn alǵan.