Qazaqstannyń Qarýly Kúshteri Armıa halyqaralyq oıyndarynyń «Ásker mádenıeti» atty konkýrsyna daıyndalýda.
Oǵan kásibı ánshiler, áskerı-tarıhı murajaılardyń shyǵarmashylyq ujymdary men qyzmetkerleri qatysady, dep habarlady Almaty-akshamy.kz QR Qorǵanys mınıstrliginiń baspasóz qyzmetine silteme jasap. Qatysýshylar konkýrsta tórt atalym boıynsha jarysatyn bolady. Atap ótsek, vokal, horeografıalyq sheberlik, aspaptyq janr men kórme qyzmeti.
– Konkýrsqa qatysýshylar patrıottyq ánderdi, memlekettik jáne orys tilderinde, álemdik klasıkalyq shyǵarmalardy oryndaıdy. Shyǵarmashylyq baıqaýǵa Qarýly Kúshteri Ulttyq áskerı-patrıottyq ortalyǵynyń áıgili ártisteri daıyndalýda. Olardyń barlyǵy – halyqaralyq baıqaýlardyń laýreattary, memlekettik marapattardyń ıegerleri, – dedi QR QK Ulttyq áskerı-patrıottyq ortalyǵy Ortalyq ansambliniń bastyǵy, aǵa leıtenant Qasym Aıtbaev.
«Ásker mádenıeti» konkýrsy 2016 jyly bekitilip, Armıa halyqaralyq oıyndarynyń ilespe jobasy bolǵan. Bıyl shyǵarmashylyq ujymdar jarysy alǵash ret ArHO-2021 baǵdarlamasyna engizildi jáne onyń qorytyndylary qatysýshy-memlekettiń jalpy reıtıńine áser etetin bolady.
Jarys áskerı qyzmetshilerge álem halyqtarynyń túrli vokaldyq jáne horeografıalyq shyǵarmashylyǵyn tanystyrý ǵana emes, talanttardy kórsetýge, Qazaqstan mádenıetiniń ulttyq beınesin kórermenderge jetkizýge múmkindik beredi.
Esterińizge sala ketsek, el Qarýly Kúshteriniń komandalary bıyl Armıa halyqaralyq oıyndarynda 11 konkýrsqa qatysatyn bolady.