Ol jobalarda 4 sý qoımasy, qus fabrıkasy, gıdroelektrostansıa, sút fermasyn salý qarastyrylǵan.
Jańadan taǵaıyndalǵan ákimder tyńdaýy tústen keıin de jalǵasty. Oblys ákimi Amandyq Batalovqa Kerbulaq, Qaratal, Eskeldi aýdandarynyń ákimderi aldaǵy jospar-jobalary týraly baıandady, - dep habarlaıdy Almaty-akshamy.kz Almaty oblysy ákiminiń baspasóz qyzmetine silteme jasap.
Kerbulaq aýdanynyń ákimi Ǵalıasqar Sarybaevtyń aıtýynsha, aýdan negizinen aýyl sharýashylyǵymen aınalysatyndyqtan, sýǵarmaly jerdiń kólemin ulǵaıtý mindeti - birinshi kezektegi másele. Ol úshin aýdanda 4 sý qoımasyna kúrdeli jóndeý jumystary júrgizilýde. 2020 jyly 541 mln teńge bólinip, "Araltóbe", "Úıeńkól" sý qoımalaryna kúrdeli jóndeý bastaldy. 2021 jyly aıaqtaýǵa 768 myń teńge bólinip, qurylys jumystary jalǵasýda. Qurylys aıaqtalǵanda óńirde qosymsha 3 myń gektar sýarmaly alqap aınalymǵa engiziledi.
Kerbulaq aımaǵynda 27 ınvestısıalyq joba tirkelgen. Olardyń jalpy quny 613 mlrd 512 mln teńge. Solardyń qatarynda broıler etin óndiretin «Káýsar Agro» JSHS qus fabrıkasynyń qurylysy bastalady. Quny 25 mlrd teńgelik joba iske qosylǵanda 600 jańa jumys orny ashylady. Kóktal ózeniniń boıynda «Jaryq Energo» JSHS jalpy qýattylyǵy 50 MVt gıdroelektrostansıasynyń 1 kaskadynyń qurylysyn bastap, jobadaǵy 5 kaskad 2025 jylǵa deıin salynyp bitedi. «Alasem» JSHS Saryózek temir jol beketine deıin 11 shaqyrym temirjol jelisin salýdy josparlap otyr. Qurylysqa 100 adam tartylady. Sol sıaqty taýarly sút fermasy, mal bordaqylaý alańdary salynady dep mejelengen. Aýdanǵa ortalyq stadıon, emhana salýǵa, kósheni jaryqtandyrý, ishki joldardy jóndeý, abattandyrý, 5 eldi mekende tozyǵy jetken medpýnktterdiń qurylysyna, Taldybulaq, Araltóbe, Qarashoqy aýyldaryna aýyz sý júrgizýge, zırattardy qorshaýǵa jáne basqa da mańyzdy qajettilikterge qarjy suraldy.
Oblys ákimi Amandyq Batalov óz sózinde qarjyny qajet etetin jobalardyń ishinde eń ózekti, kezek kúttirmeıtinderine qarjy bıylǵy ekinshi jarty jyldyqta bólinetinin, al basqasyna aldaǵy 2022 jyldyń josparly búdjetinen qaralatynyn aıtty. Máselen, zıratty qorshaý jumystaryn «Aýyl – el besigi» baǵdarlamasy arqyly atqarýǵa bolady. Al atalǵan úsh aýyldyń aýyz sýǵa qatysty jobasy respýblıkalyq búdjet arqyly qarastyrylýda. Sonymen birge ǵımaraty tozǵan áleýmettik nysandardy jańǵyrtýǵa nemese qaıta salýǵa mindetti túrde qoldaý kórsetiletini aıtyldy. Sol sıaqty oblys ákimi «Saryózek-Kóktal» jolynyń jóndeý jumystarynyń jaı-kúıi týraly surap, isti turaqty baqylaýda ustaýdy tapsyrdy. Arqarly petroglıfterin qorǵaý máselesi de nazardan tys qalmaýy kerektigi aıtyldy.
Munan keıin Qaratal aýdanynyń ákimi Erlan Isabekov aýdannyń áleýmettik-ekonomıkalyq damýynyń basym baǵyttary jaıly habarlady.
Sonyń ishinde aýyl sharýashylyǵynda asyl tuqymdy mal basyn kóbeıtý, etti baǵyttaǵy mal sharýashylyǵyn damytý, bordaqylaý alańdary, mal azyǵyn daıyndaý óndirisi bar. Erlan Isabekovtiń aıtýynsha, Qaratal aýdanynyń ınvestısıalyq múmkindikterin pash etetin prezentasıa daıyndap taratý da josparda bar. Iaǵnı aýdanda temir joldyń bolýy, óńirdiń oblys ortalyǵyna jaqyn ornalasýy, Qaratal ózeniniń aýdan aýmaǵynan aǵatyny, basqa da tabıǵı-geografıalyq, ınfraqurylymdyq múmkindikteri osy prezentasıada tolyq qamtylatyn bolady.
Aýdannyń taǵy bir usynysy – Úshtóbe qalasynda shaǵyn bıznes úshin bıznes-ınkýbator qurý. Iaǵnı Jumyspen qamtý ortalyǵynyń balansyndaǵy jalpy alańy 1,5 myń sharshy metr bolatyn 2 qabatty ǵımaratqa jóndeý júrgizip, onyń birinshi qabatyn mıkrobıznes ıelerine jalǵa berý josparlanǵan. Tigin sehy, sulýlyq salony, sheberhana, oqytý ortalyǵy, massaj kabıneti sıaqty shaǵyn bıznes ashqysy keletinder osynda ornalasa alady. Sol sıaqty burynǵy áskerı-tehnıkalyq kolejdiń qazirgi kezde qoldanyssyz jatqan aýmaǵyna ınjenerlik ınfraqurylym júrgizip, ónerkásip sektory úshin bıznes-ınkýbator qurýǵa bolady. Aýdan ákimi Úshtóbede ólketaný mýzeıin ashý týraly da usynys bildirdi. Sol sıaqty aýdandyq ortalyq aýrýhanany kúrdeli jóndeý jumystaryn aıaqtaýǵa da kómek surady.
«Amandyq Batalov bıznes-ınkýbator qurý týraly usynysty qoldaıtynyn, jobaǵa oblystyq kásipkerlik basqarmasy jan-jaqty kómek kórsetýi tıis ekenin aıtty. Aýdandyq aýrýhananyń qurylysyna qatysty birinshi orynbasary Lazzat Turlashovqa Úshtóbege arnaıy baryp, máseleniń jaı-japsaryn pysyqtaýdy tapsyrdy.
Qaratal aýdanynda sonaý Balqashqa deıingi aımaqty damytýdyń ózi bir bólek áńgime. Kúrish ósirýdiń jaıy qalaı, eldi mekenderde aýyz sý sapasyna baılanysty másele bar ma, ol týraly da eshteńe aıtylǵan joq. Sút fermalaryn qurý kerek. Aýdandy damytýdy ákim retinde jan-jaqty, barlyq salany tutas qamtı otyryp josparlaý kerek. Qaratal óńirin áli de zerttep, meńger, jergilikti turǵyndarmen, aqsaqaldarmen tyǵyz baılanysta jumys iste», - dedi oblys ákimi Amandyq Batalov.
Ákimder tyńdaýy jıynyn Eskeldi aýdany qorytyndylady. Eskeldi aýdanynyń ákimi Rýstam Álı Qarabulaq aýylyn abattandyrý, sonyń ishinde turǵyn úı qurylysy, kóshe shamdaryn ornatý, aýylishilik joldardy jóndeý, beınekameralar ornatý, kanaldardy tazartý, Jańalyq jáne Aldabergenov aýyldaryna aýyz sý júrgizý, aýdanǵa qajetti komýnaldyq tehnıka satyp alý sıaqty birqatar máseleler kóterdi.
«Qarabulaq zaýytyn iske qosýǵa daıyndyq jumystary bastalǵanyn bilesiń. Sondyqtan zaýytty qaıta júrgizýge qatysty máselelerdi túgel zerdelep, bilip júr. Aýdandy tutas damytýǵa kúsh salý kerek. Qarabulaqta turǵyn úı alańyn daıyndap, bir úı emes, qatarynan birneshe kóp qabatty úı salyp, shaǵyn aýdan turǵyzýǵa bolady. Aldymen bas jospar jasap bekitip alyp, sosyn egjeı-tegjeıli josparǵa saı qurylys, abattandyrý jumystaryn júrgize berińder. Jalpy baǵytyń durys. Men jańadan taǵaıyndalǵan ákimderge jan-jaqty qoldaý kórsetemin, soǵan saı olardan jańa ıdeıalar, jańa bastamalar jáne nátıjeli jumys kútemin jáne talap etetin bolamyn», - dedi oblys ákimi Amandyq Batalov.