178 almatylyq otbasyna «Jas Qanattan» páter kilti tabystaldy.
Búgin qala ákimi Erbolat Dosaevtyń tapsyrmasymen Almatynyń Túrksib aýdanyndaǵy «Jas Qanat» yqshamaýdanynan 178 otbasyna páter kilti tabystaldy, dep habarlaıdy Almaty-akshamy.kz tilshisi.
Bul yqshamaýdannan jyl sońyna deıin jalpy sany 401 páter beriledi. Qazirgi ýaqytta Almaty qalasy boıynsha 41 myń úı kezeginde tur.
«Jas Qanattaǵy» páterler kóp balaly jáne áleýmettik jaǵynan az qamtylǵan otbasylarǵa jalǵa alý quqyǵymen berilip jatyr. Kilt alǵandardyń kóbi páterdiń jeke menshigine berilgenin qalaıdy.
Bul yqshamaýdanda abattandyrý jumystary áli aıaqtalǵan joq. Ákimdik tarapynan turǵyndardyń jaıly ómir súrýi úshin jaǵdaı jasalyp jatyr.
Búgin ǵana munda № 211 jańa mektep ashyldy, mekteptiń qasynan balabaqsha salynyp jatyr.
«Búgin ózderińiz kýá bolǵandaı, qala basshysynyń tapsyrmasymen ákimdik kezeginde turǵan azamattarǵa páter kilti kezek tártibimen tabystalyp jatyr. 25 tamyz kúni 109 otbasy baspanaly bolǵan. Bul jerdegi páterlerdi kóp balalylar, jetim balalar, áleýmettik jaǵynan az qamtylǵan otbasylar kezekte turyp, memlekettik baǵdarlamamen alyp jatyr. Turǵyndar úshin jaǵdaı jasalýda, búgin mektep ashylsa, jyl sońyna deıin balabaqsha qurylysyn aıaqtaý josparda tur. Bul satyp alý quqyǵynsyz jalǵa beriletin páterler. Ómir boıyna jalǵa alýǵa bolady, ár 3 jyl saıyn kelisim shart merzimi uzartylady. Biraq qazir depýtattar osy azamattarǵa satyp alý quqyǵyn berý týraly zań jobasyn qarap jatyr. 2019 jyldan beri jalǵa berilgen páterlerde satyp alý quqy joq. Eger osy zań qabyldansa, bul azamattar da páterlerin meshigine ótkize alady. Munda aı saıyn 1 bólmeli páter alǵandar 20 myń teńge, 2 bólmeli páterge 20-25 myń teńge, 3 bólmeli páterge 35 myń teńge kóleminde úkimetke jalǵa alý aqysyn tóleıdi. Asfált tóselip bitse, taǵy da daıyn turǵan 4 úı bar, olardyń da kiltin tabys etemiz», dedi Almaty qalasy Komýnaldyq ınfraqurylymdy damytý basqarmasy basshysynyń orynbasary Ǵalymjan Ábdishúkiruly.
«Men 2012 jyldan beri turǵyn-úı departamentinde kezekte turdym. Allaǵa shúkir, búgin kútken páterimniń kilti de qolyma tıdi, rızamyn. Endigi tilegim – osy páterimizge satyp alý quqyǵyn berse, sapaly úı bolsa. Áıtpese, men sıaqty múgedek adamdarǵa ár 5 jyl saıyn páter aýystyryp júrý ońaı emes», deıdi baspana kiltin alyp qýanǵan turǵyn Úrimkúl Táshenova.
