Búgingi tańda nashaqorlyq álemniń kóptegen elderinde ózekti máselelerdiń biri bolyp otyr. Osy máselemen kúresý maqsatynda túrli áleýmettik jobalar men bastamalar qolǵa alynyp jatyr. Solardyń biri – Almaty qalasynda ótken "Narkostop" jobasy. Joba jastardy esirtkiden aýlaq ustaýǵa, densaýlyqty saqtaý men salaýatty ómir saltyn nasıhattaýǵa baǵyttalǵan, dep habarlaıdy aqshamnews.kz
Ásel Táshibaevanyń atalǵan jobadaǵy jetistigi – tek jeke jeńis emes, sonymen qatar qoǵamdaǵy nashaqorlyqpen kúreske qosqan eleýli úles bolyp tabylady. Ol jobanyń basty maqsattaryn júzege asyryp, jastar arasynda esirtkige qarsy áreketterdi keńinen taratýǵa úles qosyp keledi.
- Bul jeńis — barlyǵymyzdyń ortaq jetistigimiz ǵana emes, sondaı-aq bas redaktorymyz Talǵat Sembekulynyń kóregen basshylyǵynyń nátıjesi. Onyń batyl oılary men standarttan tys tásilderi kóptegen oqyrmandardyń júregine jol tapqan maqalalardyń negizin qalady. Burynǵy esirtki tutynýshylardyń ómirlik oqıǵalaryn jarıalaý týraly sheshim tek mańyzdy qadam ǵana emes, naǵyz synaq boldy. Bul qadam arqyly gazetimiz qoǵamda sırek aıtylatyn, jabyq taqyryptardy qozǵap, qıyndyqtardy jeńe bilgen jandardyń daýysyn jetkizýge múmkindik berdi. Aıta keterligi, osy bastamadan keıin basqa da basylymdar, mysaly, "Vremá" gazeti men Tengrinews portaldary eks-nashaqorlardyń syrlaryn jarıalaı bastady, - deıdi Ásel.
Áriptesimiz "Vechernıı Almaty" syndy ańyzǵa aınalǵan gazette jáne Alatau Aqparat medıaholdınginde kásibı mamandarmen birge jumys isteıtinin maqtan tutatynyn jetkizdi.
"Narkostop" jobasy jastarǵa esirtkiniń zıanyn túsindirip, olardy esirtkige qarsy turýǵa shaqyrady. Bul joba, ásirese, mektep oqýshylary men stýdentter arasynda tanymal. Almaty qalasy Jastar saıasaty basqarmasynyń jastardy áleýmettendirý jáne jastar bastamalaryn qoldaý bóliminiń basshysy Nýrsýltan Bekkaırov 2024 jyly «Narkostop» jobasy jastardyń belsendi qatysýy men seriktesterdiń qoldaýynyń arqasynda aıtarlyqtaı nátıjelerge qol jetkizgenin atap ótti. Negizgi jetistikterdiń qatarynda tómendegideı is-sharalar atqaryldy:
• 150-den astam is-shara ótkizildi;
• esirtkini jarnamalaıtyn 110 000-nan astam graffıtı boıaldy.
««Narkostop» jobasymen birlesip jumys isteý zańsyz kontentti tıimdi anyqtaýǵa jáne buǵattaýǵa múmkindik beredi. Jastar bizge belsendi túrde kómektesedi jáne bul naqty nátıje beredi. Joba aıtarlyqtaı nátıjelerge qol jetkizdi:jastar men ata-analardyń nashaqorlyq máselesi týraly habardarlyǵyn arttyrý, táýekel tobyndaǵy jasóspirimderdi qoldaý jáne olardyń ómirin ózgertýge kómektesý, esirtkini nasıhattaıtyn 60 000-nan astam graffıtıdi joıý jáne 350 ınternet-resýrstardy buǵattaý, otbasylyq faktorlar men áleýmettenýge kóbirek kóńil bólý - bul ata-analar men pedagogterge balalaryn jaqsy túsinýge jáne qoldaý ortasyn qurý úshin sharalar qabyldaýǵa kómegi tıdi», - dedi «Narkostop» jobasynyń kýratory Nurjan Jakýpov.