Almaty qalasy Bilim basqarmasynyń qoldaýymen, jumysshy mamandyqtarynyń jyly qarsańynda jasóspirimder arasynda Jas Skills chempıonaty ótti. Bul jobanyń basty maqsaty – mektep oqýshylaryna mamandyq tańdaý barysynda baǵyt-baǵdar berý, ózderin ártúrli salalarda synap kórýge múmkindik jasaý, dep habarlaıdy aqshamnews.kz
– Qazaqstan halqyna arnaǵan Joldaýynda Prezıdent Qasym-Jomart Toqaev ekonomıkamyz úshin mańyzdy salalarda mamandar tapshylyǵyn joıý jáne kadr daıarlaýdyń mańyzdylyǵyn atap ótti. Jumysshy mamandyqtary – kez kelgen qoǵamnyń damýynyń negizi. Olar kúndelikti ómirimizde bizdi qorshap turǵan ǵımarattardy, joldardy, jıhazdy, kıimderdi jáne basqa da kóptegen zattardy jasaıdy. Jas Skills – jastarǵa óz sheberlikteri men daǵdylaryn kórsetýge múmkindik beretin bedeldi shara, – dep málimdedi Almaty qalasy Bilim basqarmasynyń basshysy Saıran Saıfedenov.
Bul chempıonat birneshe jyldan beri ótkizilip keledi, alaıda bıyl alǵash ret shara Almaty memlekettik bıznes kolejiniń bazasynda uıymdastyryldy. Shahardyń 8-9-synyp oqýshylary aspazdyq ónerde ózara jarysty. Olar aspazdyq sheberlik, naýbaıshylyq, kondıterlik óner jáne vızýaldy merchendaızıng pen vıtrınıstıka salalarynda baq synady.
Qatysýshylardyń sheberligin kolejdiń arnaıy pánder oqytýshysy Janar Qapasova jáne shaqyrylǵan táýelsiz sarapshylar – oqý ornynyń túlekteri, qazirgi tańda meıramhana bıznesinde tabysty jumys istep júrgen shef-aspazdar Anton Sherbakov pen Abzal Ismaılov baǵalady. Qazylar alqasy oqýshylardyń salat daıyndaý, býterbrod jasaý jáne jemis-jıdekterden ásem kompozısıalar jasaý sheberlikterine erekshe nazar aýdardy.
– Men mundaı chempıonatqa alǵash ret qazylyq etýdemin, – deıdi Anton Sherbakov. – Qazylar alqasy taǵamdardyń sapasy men ásemdigine ǵana emes, sondaı-aq qatysýshylardyń tártibine de nazar aýdardy. Bul bizdiń salamyzda óte mańyzdy. Oqýshylardyń kózderindegi ynta-jigerdi kórip, qatty qýandym. Eger olar bolashaqta kásibı ómirlerin meıramhana bıznesimen baılanystyrsa, myqty básekelesterge aınalatynyna senimdimin. Qazirgi tańda bul salada jańa bastaýshy mamandar úshin múmkindikter óte kóp.
Ár sanatta jeńiske jetken qatysýshylar dıplomdar men grantqa kolejge túsýge múmkindik beretin sertıfıkattarǵa ıe boldy. Bul olardyń bolashaq mamandyqtaryn tańdaýda mańyzdy qadam bolmaq.