QR MSM "Ortalyq memlekettik arhıv" RMM-i Keńes Odaǵynyń Batyry, jazýshy B. Momyshulynyń jeke qory taǵy da tyń qujattarmen tolyqqanyn málimdedi, dep habarlaıdy Almaty-akshamy.kz.
Keńes Odaǵynyń Batyry, Uly Otan soǵysynyń ardageri, dańqty panfılovshy, jazýshy B. Momyshulynyń qosymsha qujattaryn QR OMA Zeınep Baýyrjan kelini Ahmetova tapsyrdy.
1951 jyly tuńǵysh ret B. Momyshulynyń ózi qujattaryn QR OMA-ne óz qolymen syı retinde memlekettik saqtaýǵa tapsyrǵan. Batyr atamyzdyń arhıvke úzdiksiz ótkizgen qujattarynyń hronologıalyq sheńberi 1927-1975 jyldardy qamtydy.
«Baýyrjan Momyshuly qujattarynyń kóp bóligin amanat etip Z. Ahmetovaǵa qaldyrǵan eken. 2021 jyly QR OMA-niń 100 jyldyq mereıtoıy kezinde «Baýyrjan Momyshuly – Keńes Odaǵynyń Batyry, Uly Otan soǵysynyń ardageri, dańqty panfılovshy, jazýshy» atty fotoalbomnyń tusaýkeserine qonaq retinde kelgen Z. Ahmetova batyr atamyzdyń qosymsha qujattaryn arhıvke tapsyratyndyǵy jóninde amanatyn aıtqan edi. Endi bıyl sonyń sáti túsip B. Momyshulynyń qara shańyraǵynda 9-shy tamyzdan bastap arhıvıster G.Sh. Rahmet jáne K. Daýt baryp qujattardyń ótkizý tizimdemesin jasaý arqyly qabyldaý jumystaryn júrgizýde»,-delingen habarlamada.