Bıyl ár oqýshyǵa kem degende 37 389 teńge qarjy qarastyrylǵan
Jańa oqý jyly qarsańynda 150 myńǵa jýyq otbasyna mektep formasy men keńse taýarlaryn alý úshin búdjetten qarjy aýdarylady, dep habarlaıdy Almaty-akshamy.kz.
150 myńǵa jýyq otbasy balalaryn mektepke daıyndaý úshin memleketten qarjylaı kómek alyp úlgerdi. Bul kómekti áleýmettik osal sanattaǵy 440 myńnan astam bala alady.
Bıyldan bastap Oqý-aǵartý mınıstrligi materıaldyq kómek kórsetý erejelerine ózgerister engizdi. Buǵan deıin óńirlerde bólingen soma 17 myńnan 40 myń teńgege deıin bolsa, bıyl bul soma ulǵaıtylyp, keminde 37 389 teńgeni qurap otyr.
«Sondaı-aq kómek kórsetý tetigine de ózgerister engizildi. Endi ata-analarǵa mektep formasyn, aıaq kıim, keńse taýarlaryn jáne t.b. balalarymen birge tańdap, satyp alýy úshin jeke shottaryna aqsha aýdarylady. Buryn munyń barlyǵyn ákimdikter satyp alatyn jáne ol taýarlardyń ólshemine, sapasyna jáne t.b. baılanysty máseleler týyndaıtyn»,- delingen Oqý -aǵartý mınıstrliginiń habarlamasynda.
Jalpyǵa birdeı bilim berý aıasynda ataýly áleýmettik kómek alatyn otbasylardyń balalaryna, sondaı-aq AÁK almaıtyn, biraq jan basyna shaqqandaǵy ortasha tabysy eń tómengi kúnkóris deńgeıinen tómen otbasylardyń balalaryna, jetim balalarǵa jáne ata-anasynyń qamqorlyǵynsyz qalǵan balalar, tótenshe jaǵdaıǵa tap bolǵan oqýshylarǵa jáne t.b. kórsetiledi.