Shabandozdar 6 kún ishinde jalpy 550 shaqyrym joldy júrip ótti
12 komanda qaldy. 11 qyrkúıekte «Uly dala joryǵy» marafon-báıgesiniń altynshy kezeńi aıaqtaldy. Tańǵy 7:00-de 14 komanda Alasha han kesenesinen Jezqazǵan mańyndaǵy Talap aýylyna jolǵa shyqty, dep habarlaıdy almaty-akshamy.kz.
Joryq baǵdarlamasyna sáıkes, komandalar marafon-báıgeniń taǵy 100 shaqyrymyn baǵyndyryp, altynshy kezeń máresi Talap aýylynda qorytyndylandy. Osylaısha, shabandozdar 6 kún ishinde jalpy 550 shaqyrym joldy júrip ótti.
Altynshy kezeń qorytyndysy boıynsha, Qostanaı oblysynyń komandasy jeńimpaz atandy. Bul joly aqtóbelik shabandozdar máre syzyǵyna ekinshi bolyp kelse, Mańǵystaý oblysynyń «Kókmoınaq» komandasy úshinshi bolyp jetti. Ókinishke qaraı, atalmysh kezeńde attarynyń jaraqat alýyna baılanysty Qyzylorda, Aqmola komandalary jarysty toqtatty.
Alty kúnniń qorytyndysy boıynsha komandalardyń jalpy ýaqyty:
1 oryn - Mańǵystaý oblysy, 35 saǵat 49 mınýt 16 sekýnd
2 oryn - Aqtóbe oblysy, 37 saǵat 26 mınýt 40 sekýnd
3 oryn - Qostanaı oblysy, 38 saǵat 20 mınýt 20 sekýnd
4 oryn - Jetisý oblysy, 38 saǵat 45 mınýt 25 sekýnd
5 oryn - Jambyl oblysy, 39 saǵat 10 mınýt 08 sekýnd
6 oryn - Astana qalasy, 40 saǵat 03 mınýt 58 sekýnd
7 oryn - Abaı oblysy, 40 saǵat 56 mınýt 03 sekýnd
8 oryn - Almaty qalasy, 41 saǵat 41 mınýt 03 sekýnd
9 oryn - Túrkistan oblysy, 44 saǵat 44 mınýt 25 sekýnd
10 oryn - Almaty oblysy, 47 saǵat 14 mınýt 18 sekýnd
11 oryn - Qaraǵandy oblysy, 48 saǵat 19 mınýt 00 sekýnd
12 oryn - Ulytaý oblysy, 60 saǵat 46 mınýt 36 sekýnd
Talap aýylynda túnegen 12 komanda erteń, ıaǵnı 12 qyrkúıekte tańǵy saǵat 7:00-den bastap alǵashqy 50 shaqyrymdy eńserý úshin Jezqazǵan-Qyzylorda tas jolyna baǵyt alady. Túski astan soń 7-kezeńniń kezekti 50 shaqyrymyn baǵyndyrýy tıis. Sonymen komandalar aldynda 650-inshi shaqyrymdy eńserý mindeti tur.
Ókinishke qaraı, komanda quramynda 4 qyz qalǵan Aqmola oblysynyń «Imanjúsip» komandasy alǵashqy 50 shaqyrymdy ótkennen keıin eki atynyń jaraqat alýyna baılanysty jarysty toqtatýǵa májbúr boldy. Degenmen «shabandoz arý» atanǵan Lázzat Ahmetova bul jeńilis emes, kerisinshe alǵash ret burymdylardyń bóriktilermen birge ıyq tirese joryqqa qatysýy úlken jeńis ekenin atap ótti.
«Joba maǵan qatty unady. Biz úshin eń mańyzdysy – attardyń amandyǵy. Saıys bolǵan soń jaraqattyń bolmaýy múmkin emes. Ókinishke qaraı, jylqylarymyz aıaqasty jaraqat aldy. Eń sońǵy elý shaqyrym biz úshin óte kúrdeli bolsa da, jol boıynda tarıhı, mádenı nysandarǵa kýá boldyq. Alash han, Joshy han kesenelerin kezdestirdik. Men mundaı marafon-báıgege alǵash ret qatysyp otyrmyn. Uıymdastyrýshylarǵa alǵysym sheksiz», - dedi L. Ahmetova.
Eske sala keteıik, buǵan deıin BQO, SQO, SHQO, Pavlodar oblystary men Shymkent qalasynyń komandasy jarystan shyǵyp qalǵanyn habarlaǵan edik.
Aıta keteıik, «Uly dala joryǵy» respýblıkalyq marafon-báıgesiniń bas seriktesi – «Sport Qory» týrızm ındýstrıasy men sportty qoldaý qory.