20 qyrkúıekten bastap Almatyda kúzgi aǵash otyrǵyzý bastalady. Qalada 298 myń kóshet egiledi, dep habarlaıdy Almaty-akshamy.kz
Kúzgi otyrǵyzý qalanyń barlyq aýdanyn qamtıdy. Atap aıtsaq, Medeý aýdanynda 22 myń, Jetisý aýdanynda 16 myń, Túrksib aýdanynda 28 myń, Naýryzbaı aýdanynda 10 myń, Almaly, Áýezov jáne Bostandyq aýdandarynda 5 myń, Alataý aýdanynda 207 myń aǵash.
Ǵalymdardyń usynysy boıynsha bıyl Almatynyń qalalyq kógaldandyrýshylary tek atalyq terek otyrǵyzady.
Botanıka jáne fıtoıntrodýksıa ınstıtýtynyń bas dırektory Gúlnár Sıtpaeva aıtýynsha, terekter atalyǵy da, analyǵy da bar ekiúıli ósimdik.
«Analyǵy pisip-jetilgen soń kóp mólsherde mamyq shyǵarady, bul kóptegen adamda alergıalyq reaksıa týdyrady. Atalyqtary mundaı reaksıa bermeıdi», - deıdi ǵalym.
2017 jyly ǵylymı qyzmetkerler Almaty qalasyn kógaldandyrý boıynsha usynymdar jınaǵyn shyǵardy, oǵan jergilikti klımat pen qalalyq jaǵdaıǵa barynsha qolaıly aǵash ósimdikteriniń 200-ge jýyq túri engizilgen.
«Olardyń ishinde kúzgi otyrǵyzý kezinde shegirshin, úıeńki, shaǵan, qaıyń, emen, jóke, terek jáne basqa da jalpaq japyraqty túrleri qoldanylady. Sándik aǵashtardan qabyrjaq, qyna aǵash sıaqty máńgi jasyl túrleri otyrǵyzylady», - dedi ol.
Otyrǵyzý úshin tańdalǵan barlyq ósimdik kópjyldyq synaqtan ótti, qaladaǵy aıazǵa, qurǵaqshylyqqa jáne zıandy shyǵaryndylarǵa tózimdiligin kórsetti.
Almaty qalasynyń jasyl jelekterin kútip-baptaý men qorǵaýdyń jańa erejesine sáıkes, kóshetterdi tańdaýda talaptar kúsheıtildi – belgili bir mólsherde (bıiktigi keminde 2-2,5 m), jaqsy ósken tamyr jabyq ári shymymen bolýy kerek. Bul sharalar aǵashtardyń tamyrlanyp ósý múmkindigin arttyryp, qýrap ketýin azaıtady.