Eresek halyqtyń temeki tutynýy boıynsha úı sharýashylyqtaryn iriktep zertteý nátıjeleri boıynsha respondentterdiń 20,4% temeki tartady (temeki tartpaıtyndar – 79,6%), barlyq er adamnyń 38,4%, (temeki tartpaıtyndar – 61,6%), al áıelderdiń 8,4% temeki ónimderin tutynady (temeki tartpaıtyndar – 91,6%).
Temekini tartý jıiligi boıynsha halyqtyń bólinisi kelesideı: respondentterdiń 16,6% temekini kún saıyn tartady, anda-sanda tartatyndar – 3,8%, dep habarlaıdy Almaty-akshamy.kz.
Úılerinde temeki tútininiń áserine ushyraıtyn respondentterdiń úlesi – 12,8%, jumysta – 8,1%, qoǵamdyq tamaqtaný oryndarynda – 10,5%, olardyń basym kópshiligi (93% astamy) temeki tartpaıtyn adamdar.
Óńirler arasynda temeki ónimderin tutynatyndardyń eń kóp úlesi Qaraǵandy (25,4%), Pavlodar jáne Jambyl oblystarynda (24,6%) tirkeldi.
Temeki tartý aýyr aýrýlardy týdyrady dep sanaıtyn respondentterdiń úlesi 85,5%-dy quraıdy.
Qoǵamdyq oryndarda temeki tartýǵa tyıym salý týraly zańnamanyń qoldanylýyn qoldaıtyndar – 67,7%.
2021 jylmen salystyrǵanda 2022 jyly temeki tartatyn respondentterdiń úlesi 18–28 jas jáne 60 (63) jas jáne odan joǵary jas toptarynda ósti, qalǵan jas toptarynda tómendedi.
Ulttyq statısıka búrosy 2020 jyldan bastap Qazaqstan Respýblıkasy Densaýlyq saqtaý mınıstrliginiń usynysy boıynsha eldegi eresek halyqtyń temeki tutynýy boıynsha zertteý júrgizedi. Onyń maqsaty – temekini tutyný, pasıvti temeki tartý jáne temekini tastaýǵa degen ynta-jigerdiń bolýy jaıynda baǵalaý derekterin alý, sondaı-aq temeki tutynýdy baqylaý men onyń aldyn alý.
Saýalnama júrgizý úshin turmys deńgeıi boıynsha úı sharýashylyqtaryn iriktep zertteý jelisi qoldanylady. Derekterdi jınaý respondentterdiń suraqnamalardy toltyrýy arqyly júrgizildi, bul rette zertteýde respondent retinde 11 839 úı sharýashylyǵynyń 15 jáne odan joǵary jastaǵy bir múshesi qatysty.