Sý únemdeý tehnologıalaryn qoldaný nátıje berdi.
Búginde teńizdegi sýdyń jalpy kólemi 22 mıllıard tekshe metrge jetti, dep habarlaıdy aqshamnews.kz
Qyzylorda oblysynyń sharýalary sý únemdeý tehnologıalaryn engizýdiń nátıjesinde 200 mln tekshe metrge jýyq sý únemdedi. Bul sý Aral teńizine jiberildi.
Sý resýrstary jáne ırrıgasıa mınıstrliginiń málimetinshe, bıyl óńirdiń dıhandary 55 myń gektar kúrish alqabynda sý únemdeý tehnologıalaryn qoldandy. Qyzylorda oblysyndaǵy kúrish alqaptarynyń jalpy aýdany – 84 myń gektar.
Osylaısha, 2024 jylǵy sýarý maýsymynda teńizge shamamen 1 mlrd tekshe metr sý jiberildi. Bul ótken jylmen salystyrǵanda 3 ese kóp.
Jyl basynan beri Soltústik Aralǵa shamamen 2 mlrd tekshe metr sý jiberildi. Búginde teńizdegi sýdyń jalpy kólemi 22 mıllıard tekshe metrge jetti.
«Sý dıplomatıasy men Ortalyq Azıadaǵy áriptesterimizben tyǵyz jumystan bólek, Aral teńizine sý jiberýge únemdi tehnologıalardy engizý de mańyzdy ról atqarady. Olardy qoldaný júzdegen mln tekshe metr sý únemdeýge jáne ony teńizge baǵyttaýǵa múmkindik beredi. Ol úshin biz sharýalardyń sý únemdeý tehnologıalaryn engizýge jumsaǵan shyǵyndaryn sýbsıdıalaý kólemin 50%-dan 80%-ǵa deıin ulǵaıttyq. Aldaǵy úsh jylda sý únemdeý tehnologıalarymen sýarmaly sýdy paıdalanatyn sharýa qojalyqtary úshin sýbsıdıa mólsheri 50%-dan 85%-ǵa deıin ulǵaıady», -dedi vedomstvo basshysy Nurjan Nurjigitov.