Túrkıanyń Ystambul qalasynda elimizdiń týrızm jáne sport vıse-mınıstri Serik Jarasbaev pen 5-shi Dúnıejúzilik kóshpendiler oıyndaryn ótkizý jónindegi Dıreksıa jetekshisi Naıl Nurov Dúnıejúzilik etnosport konfederasıasynyń prezıdenti Bilál Erdoǵanmen kezdesip, uıymdastyrý jumystaryna qatysty máselelerdi talqylady.
Týrızm jáne sport vıse-mınıstri Serik Jaraspaev kóshpendiler oıyndaryna daıyndyq jumystary men aqparattyq-nasıhat sharalarynyń qyzý júrip jatqanyn habardar etti.
Dıreksıa jetekshisi Naıl Nurov 5-shi Dúnıejúzilik kóshpendiler oıyndarynyń mańyzyn eskere otyryp, ashylý jáne jabylý saltanaty men saıys barysyn álemniń jetekshi telearnalary arqyly taratý máselesin de ortaǵa saldy.
Bilál Erdoǵan taraptar arasyndaǵy áriptestik qatynastyń artqanyn aıta kele, kóshpendiler oıyndaryn uıymdastyrý Qazaqstannyń etnosport qozǵalysyn álemdik deńgeıde nasıhattaýdaǵy utqyr jobalarynyń biri ekenine aıryqsha mán berdi.
Jıynda Qazaqstan delegasıasynyń 16-18 aqpan aralyǵynda ótetin Dúnıejúzilik etnosport konfederasıasynyń Kongresine qatysatyny da naqtylandy.
Ystambuldaǵy Dúnıejúzilik etnosport konfederasıasynyń keńsesinde ótken kezdesýge Túrkitildes memleketterdiń yntymaqtastyq keńesiniń Bas hatshysy Baǵdat Ámireev pen Qazaqstan Respýblıkasynyń Bas konsýldyǵynyń ókilderi de qatysty.
2024 jyldyń 8-14 qyrkúıek aralyǵynda Astanada ótetin 5-shi Dúnıejúzilik kóshpendiler oıyndaryna 100-den astam memleketten 4000-ǵa jýyq sportshy qatysady dep kútilýde.
5-shi Dúnıejúzilik kóshpendiler oıyndarynyń urany - «ULY DALA DÚBİRİ».