Aqtóbe Áleýmettik-kásipkerlik korporasıasynyń burynǵy basqarma tóraǵasy ári Aqtóbe oblysynyń burynǵy ákimine úkim shyqty.
Ermek Imantaevqa qylmystyq kodekstiń 189-baby 4-bóliginiń 2-tarmaǵy boıynsha (senip tapsyrylǵan bóten múlikti asa iri mólsherde urlaý) aıyp taǵylyp, is sotta qaralǵan, dep habarlaıdy Almaty-akshamy.kz Ulysmedia.kz-ke silteme jasap.
Sotta Imantaevtyń Aqtóbe ÁKK basqarma tóraǵasy bola tura, «Sadovoe» turǵyn úı alabynda ornalasqan kólemi 24 ga jer ýchaskesin, baǵasyn 10 ese túsirip zańsyz túrde satqany anyqtalǵan.
“Sottalýshy jerdiń naryqtyq qunyn qasaqana 20 mln teńgege deıin tómendetip, jer ýchaskesi týraly jalǵan aqparat usynyp, tólemdiń jasalmaǵanyna qaramastan, jalǵan satyp alýshy S.-pen zańsyz satyp alý-satý kelisimshartyn jasaǵan. Ári qaraı, jer ýchaskesi jalǵan tulǵa S.-qa qaıta rásimdelip, jerdiń nysanaly maqsaty «jeke turǵyn úı qurylysynan» «kópqabatty turǵyn úı qurylysyna» ózgertildi. Jalǵan tulǵa S.-pen jerdiń 17,2 ga kólemindegi bóligi Batys-3 móltek aýdanyndaǵy 4 jer ýchaskesine keıin turǵyn úı salýshylaryna satý úshin aıyrbastalǵan”, – dep habarlaıdy Aqtóbe soty.
Imantaevtyń tapsyrmasymen jalǵan tulǵa S. joǵaryda atalǵan Batys-3 móltek aýdanyndaǵy 3 ýchaskesi jáne «Sadovoe» turǵyn úı alabyndaǵy qalǵan 2,3 ga kólemindegi jer ýchaskesi úshinshi tulǵa K.-ge qaıta rásimdelgen. Jer ýchaskesin zańsyz satqan E.Imantaev AQ tulǵasy retinde memleketke 199,4 mln teńge somasyna asa iri mólsherde zalal keltirgen.
Sottalýshynyń kinási kýálardyń aıǵaqtarymen, saraptama qorytyndylarymen jáne basqa da dáleldemeler jıyntyǵymen rastalǵan. Prokýror sottan E.Imantaevqa memlekettik qyzmette qyzmet etý quqyǵynan ómir boıyna aıyra otyryp, 10 jyl merzimge bas bostandyǵynan aıyrý jazasyn taǵaıyndaýdy surady.
Sottalýshy Imantaev ózine taǵylǵan aıyppen kelispegen.
Sottyń úkimimen Ermek Imantaev kináli dep tanylyp, oǵan memlekettik qyzmette qyzmet etý quqyǵynan ómir boıyna aıyra otyryp, 8 jyl merzimine bas bostandyǵynan aıyrý jazasy taǵaıyndaldy. Azamattyq talap qanaǵattandyrylyp, sottalǵannan memleket paıdasyna 199,4 mln teńge óndirildi. Úkim zańdy kúshine engen joq.