«Almaty aqshamy» gazetiniń oqyrmandary taǵy da zor qýanyshqa keneldi. Súıikti basylymdaryna jazylyp, túbirtegin redaksıaǵa joldaǵan oqyrmandar arasynda utys oıyny uıymdastyrylyp, jeńimpazdar belgili boldy.
Oqyrmandar qatarynda «Bilgenim bir toǵyz, bilmegenim toqsan toǵyz» dep, basylymnyń árbir sanyn qyzyǵa paraqtap, 35 jyl birge kele jatqan oqyrmandar da boldy. Degenmen, patsha kóńil oqyrmannyń basty maqsaty – utysqa qatysyp, utý emes, súıikti basylymmen birge bolý.
Búginde gazetimizdiń turaqty oqyrmanyna aınalǵan Seıitqalı Myrzabekov Almatyǵa basqa óńirden qonys aýdarǵan kórinedi.
– Almatyda turatyn árbir turǵyn qalamyzdyń basty basylymyna jazylýy tıis. Osy qalaǵa kóship kelgen kúnnen bastap, «Aqshamǵa» jazylǵan edim. Gazet bizdiń otbasynyń bir múshesine aınalyp ketkeli qashan. Balalaryma da oqyp beremin. Tarıhı materıaldardy qıyp alyp, saqtap qoıamyn, – deıdi turaqty oqyrman.
Bul kúni utys oıynyna qatysyp, baǵaly syılyqqa qol jetkizgen oqyrmandardyń kóńil-kúıleri tipti kóterińki boldy.
Turaqty oqyrmanymyz Seıitqalı Myrzabekov «Almaty aqshamy» gazetiniń jeńimpazy atanyp, qysqa tolqyndy «MAQNA M 20 V7001- W» peshin, Erkin Túsiphanov «Frizzman FF-38» sháınek-termosyn, Láılá Igilikova «Sobranie MJ-2819» blenderin utyp aldy.