«Qaraózek» shaq qarasyn kórsetti

Naýryz aıy sońǵy aptasyna aıaq basty. Jańa týǵan aı jaýyny, jeli kóp «Qus qanaty», «Alasapyran» amaldarynyń tabaldyryqtan attaǵanyn ańǵartqandaı shalqalap jatyr

Áne-mine degenshe, naýryz aıynyń sońǵy aptasy kelip jetti. «Samarqannyń kók tasy» jibıtin kún (22 naýryz) ótti. Ulystyń Uly kúni elimizde buryn-sońdy bolmaǵan jańa­lyq-erekshelikterimen atalyp ótti. Naýryz merekesi musylmannyń qasıetti Ramazan aıyna ulasyp, nur ústine nur ákeldi.

Kún men tún teńeskesin, kún jylyp, jer jibip, shýaqty mezgil bastalýy - tabıǵat zań­dylyǵy. Biraq shýaqty shaqtar áli turaqta­maı tur.

Ótken paıymymyzda: «...kúni keshe er­teńgilik jerge qyraý tústi. Burynǵynyń shaldary naýryzdyń ortasynda bir kúndik «besqonaq» bolady deýshi edi, sonyń áseri me eken, ne de bolsa, bul kórinister saqtyq sha­rasyna shaqyryp turǵandaı...» dep jazǵan edik. Sol joramalymyz beker bolmaǵan sekildi. Sońǵy 5-6 kúnniń bederinde tańer­teńgilik pen keshki ýaqytta deneni tońdyrǵan salqyn lep tolastamaı tur. Jańa týǵan aıdy kórdik. Jaýyny men jel-daýyly kóp «Qus qanaty», «Alasapyran» amaldarynyń tabal­dyryqtan attaǵanyn ańǵartqandaı shalqalap jatyr...

Sońǵy «tuıaq serper» aptada amal da az emes. Solardyń biri – «Qus qanaty» amaly. Naýryz aıynyń sońǵy kúnderinde jyl qus­tary ushyp kele bastaıdy. Olardyń kelýi­men qar aralas jańbyr jaýyp, sýyq jel tu­rady. Muny el «Qus qanaty» dep ataǵan.

Naýryz aıynyń sońynda, keıde sáýirdiń basqy kezinde qar kúrt erip, jer laısań bo­lyp, sharýashylyqqa qıyn kúnder týady. Osyndaı jaısyz da qolaısyz merzim óz bol­mysyna qaraı, «Alasapyran» dep atalǵan.

Qazir sıyrǵa «oraza» ustatqan «Ábdikeı» amaly aıaqtalyp keledi. Qalyń qardyń sheti sógilip, erip, saı-sala sýǵa tolyp jatyr. Jer asty tońy jibı bastaıdy. «Qardan aqqan sýǵa torǵaı shomylatyndaı bolsa, jaz erte shyǵady dep, qardan aqqan sý mardymsyz bolsa, jaz jáı shyǵady dep» kónekóz qarıa­lardyń joramal jasaıtyny osy kez.

Naýryzda ótip bolmaıtyn uzaq kúnder – «uzynsary» kelip, qońtorǵaılaý qaraózek shaq týady. Naýryzda atan túıeni jyǵar, kóktemniń qar eriter «altyn kúrek» ókpek jeli, qarasýyǵy bar.

Búgin qoldanystaǵy kúntizbe boıynsha, aıdyń – 25-i. Aı júıesi boıynsha, 3-i. Al qazaqy esepke súıensek, naýryz aıynyń –12- si. Joǵaryda biz aıtqan amaldardyń ázir yqpaly baıqalmaıdy. Aspan ashyq, kún shýaqty. Degenmen, buǵan qarap kóktem shy­ǵyp ketti deýge erterek. Áli alda talaı jaýyndy da daýyldy kezder bar ekeni shúbásiz...