«ALMATY AQSHAMY» – 35 «Aqsham» ardagerleri
2005 jyly tanymal qalamger Qalı Sársenbaı «Aqshamǵa» redaktor bolyp kelgende gazet redaksıasynda jýrnalısik qyzmetimizdi jalǵastyrǵan edik. Osynda júrip «Aqshamnyń» 20, 25 jáne 30 jyldyq mereıtoıyn ótkizdik. Gazettiń 35 jyldy- ǵynda zeınetkerlik jasqa kelsek te, árbir nómirin úzbeı oqyp otyramyz. Egdelik jasta árkim-aq óziniń jastyq shaǵyn tamsana eske alatyn ádeti emes pe? Bizdiń de qulshynyp eńbek etken, gazettiń árbir nómirin tartymdy da, mazmundy etip shyǵarýǵa kúsh salǵan kezimiz eske túsedi.
Alyp shahar – Almatynyń kúndelikti tynysyn gazet betinde jarıalap otyrýmen birge qazaq rýhanıatyna qatysty kesek-kesek materıaldardy úzbeı jarıalaýǵa den qoıdyq. Myqty-myqty zıaly qaýym ókilderinen belsendi avtorlar qataryn gazet jumysyna tarttyq. Belgili teatr synshysy Áshirbek Syǵaı, mádenıettanýshy Talasbek Ásemqulov, jazýshy-jýrnalıst Zákir Asabaev bastaǵan qarymdy qalamgerlerdiń serıaly maqalalary gazet betinen turaqty oryn alyp keldi.
Qazaq zıaly qaýymynyń yqylasy «Aqshamǵa» aýyp, gazet betinde kóterilgen ózekti máselelerge usynys-pikirlerin bildirip otyrdy. Sonyń nátıjesinde gazet tırajy artyp, turaqty oqyrmandar qatary qalyptasty. Ótken jyldar bedelinde gazette úzdiksiz jarıalanyp kelgen «Sana tazarmaı, qala tazarmaıdy», «Alash ardaqtylary», «Almaty turǵyndary», «Almaty aıymdary», «Almatylyqtardyń aldanyshy», «Óz sózim ózimdiki», ózge de aýqymdy aıdarlardy qamtyǵan ózekti maqalalar oqyrman yqylasyn aýdardy. Súıekti taqyryp tóńireginde qaýzap jazyp, aýqymyn keńeıtip, kitapqa aınalǵan «Almatyny basqarǵandar» sıaqty ómirsheń jobalar da boldy. Belgili sóz zergeri İslám Jarylǵapov týraly jazǵan maqala aýqymyn keńitip, «İslám Jarylǵapovtyń myń bir sózi» taqyrybymen alty aı boıy gazetten oryn alyp, oqyrman nazaryn aýdardy.
Akademık Ómirzaq Aıtbaev: «Buryn- sondy zerttelmeı kelgen islámtaný ilimin bastap bergen «Almaty aqshamy» gazeti boldy... 2008 jyly jurtshylyq qolyna tıgen «Sóz zergeri İslám Jarylǵapov» atty kitapty erekshe ataýǵa bolady. Bul islámtaný ilimine qosylǵan úlken úles boldy. Eger ǵylym álemindegi burynǵy júıe ornynda bolǵanda bul eńbekti ǵylymı ataq beretin ǵylymı keńeske usynýǵa bolar edi» dep jazǵany mereıimizdi kóterip tastady. («Ana tili», 4 qyrkúıek, 2013 jyl).
«Aqshamda» qyzmet atqarǵan jyldary kóktemgi Naýryz ben tól merekemizden bastap, barlyq aıtýly kúnderdi ujym bolyp toılaıtynbyz. Taýǵa baryp, tabıǵat aıasynda ótkizgen kúnderimiz de áserli bolatyn. Ujymnyń árbir múshesiniń qýanyshy men renishine ortaqtasyp otyrdyq. Shyǵarmashylyq kúsh-qýatymyzben eńbek etip, yntymaq-birligimizdiń arqasynda kóńildi demala da bildik. Osylaısha «Aqshamda» ótken jyldarymyz ómirdegi eń shýaqty shaǵymyz bolyp este qaldy.