«ALMATY AQSHAMY» – 35 «Aqsham» ardagerleri
1988 jyly «Almaty aqshamy» ashylǵanda el-jurttyń sanasynda erekshe bir silkinis paıda boldy. Bul – keńestik júıeniń kúni bitip, Jeltoqsan ótip, táýelsiz el bolamyz dep jelpinip júrgen alaquıyn shaq edi. Men aıaqastynan gazetke redaktordyń orynbasary bop keldim. Gazet kún bata shyǵady. «Vecherka»-ǵa kózderi úırengen jurttyń, ásirese, zıaly qaýymnyń júregi «Almaty aqshamy» dep soǵa bastady, júre kele «Aqsham» deıtin boldy. Táýelsizdik tabaldyryǵynan táı-táı basqan qazaqy kóńilder óz tútininde shalqyp otyryp qanaǵat sezimmen «Aqshamdy» oqydy, dúńgirshekten tappasa, redaksıaǵa kep alyp ketip júrdi.
Jýrnalıser de saıdyń tasyndaı edi. Qanat Qaıymov, Raýshan Imasheva, t.b. qyz- jigitter ártúrli taqyryptardy qozǵap, tyńǵa túren sala bastady.
Ózim osy «Aqshamda» júrgende «Kózboıaýy joq kórinister» sıklyn bastadym. Jurtshylyq jyly qabyldady. Kitap keıinge qalyp, qalta telefon qyltıyp qolǵa iligip, el-jurt ınternetke ıile bastaǵan shaqta ómir kórinisterin birsydyrǵy qabyldaý da ózgeriske ushyrady. Osy sáttegi kóńil kúıdi tap basyp, ómirdiń kúngeıi men kóleńkesine bir sát baǵa berý mindet boldy. Qaıta qurý men táýelsizdik arasyndaǵy osyndaı ekiudaı sezim bizdiń sanamyzǵa da alaı-dúleı ózgerister ákeldi, «qashanǵy taltaıyp turamyz?» degen áýleki sózdiń shyqqan kezi de osy shaq.
Tipti, aıtys aqyndarynyń «qaıta qurý degenim – qaıta qurý, atymdy qaıta erttep, qaıta miný» dep tópep, ýaqyttyń qosyn jekkeni de kóz aldymyzda. Biraq qaıta erttelgen at pen atyrylyp alǵa shyqqan sáıgúlikti kóre qoımadyq, halyq jalań sóz ben jadaǵaı urannyń tasasynda qala berdi. Osyndaı kóńil kúı «Kózboıaýy joq kórinister»-diń arqaýy boldy. B u l jazbalardy tek «Aqshamǵa» ǵana jarıalap júrdim.
«Aqshamda» uzaq istegenim joq, biraq mazdaǵan ottyń tutanyp, ushqynnyń jalynǵa aınalýyna kýá boldym. Gazettiń alǵashqy sandaryn saqtap qoıdym. Mine, sodan beri de jyljyp 35 jyl óte shyǵypty. «Aqsham» qazir tek qalalyq emes, respýblıkaǵa áıgili basylym, «Aqshamnyń» aýqymy keń. Qanshama qalam ıeleri osy shańyraqtan qanat qaqty. Astana soltústikke aýysqanmen, «Almaty aqshamy» Ońtústik astananyń kózi bop qala berdi. Bul da «Qazaq» gazeti sıaqty qazaqpen birge jasap, qýanyshy men muńyn birge bólisken áıgili basylymǵa aınaldy der edim. 35 jyl kóz ushynda qol bulǵap ketip barady.