«ALMATY AQSHAMY» – 35 «Aqsham» ardagerleri
Osy ǵumyrynda mádenıet pen ádebıettiń, bilim men ǵylymnyń jáne bıznestiń ortalyǵyna aınalǵan elimizdiń ásem de alyp shaharynyń tynys-tirshiligin kórsetýde, iri qalada atqarylyp jatqan irgeli isterdi dáripteýde «Almaty aqshamy» birqatar ıgi sharalardy júzege asyryp keledi. «Almaty aqshamy» gazeti eń aldymen ulttyq dástúrimizdi alyp keldi. Qalanyń jańalyǵyn, qoǵamdaǵy irili-ýaqtyly mańyzdy sharalardy ana tilimizde jetkizdi. Bul, ásirese, aýyldan kelgen qonaqtarǵa, oqý izdep kelgen jastarǵa óte qolaıly boldy. Qajetti anyqtamalardy «Almaty aqshamynan» taýyp alyp otyrdy.
Men osy basylymda 2007 jyldan zeınetkerlikke shyqqanymsha – 2013 jyldyń sońyna deıin qyzmet ettim. Zeınetke shyqqannan keıin avtor retinde kúni búginge deıin eńbek etip kelemin. Qazir Almaty ábden úlkeıgen, tirshiligi damyǵan megapolıs. Kún saıyn qansha qurylys jumystary, túrli sharalar atqarylyp jatady. Ádebıet te, mádenıet te, bıznes pen bilim ordalary da osynda. Solarda kúndelikti bolyp jatqan san salaly jańalyqtar «Almaty aqshamynyń» betinen óz ornyn taýyp jatady.
Aıtaıyn degenim, sońǵy jyldary Túrkistan oblysy, onyń ber jaǵynda Almaty, Jetisý, Ulytaý jáne Semeı oblystary ashyldy. Elimizdiń aımaǵy kóbeıdi, tynysy keńeıdi. Mine, bizdiń «Almaty aqshamy» gazetimizdiń 35 jyldyǵy osyndaı aıshyqty da mańyzdy oqıǵalar oryn alyp otyrǵan kezge saı kelip otyr. Basylym jýrnalıseri shahardyń sheńberimen shektelip qalmaı, atalmysh aımaqtardyń da jańalyqtaryn jarysa jazsa, jetistikterdi kóbirek qamtysa, qandaı keremet bolar edi. Elimizdiń árbir óńiri ońtústik astana atalyp júrgen Almatynyń jańalyq-jetistigin bilýge qushtar. Qala kóshelerine jańa esimder berilip jatyr. Bári de qazaqqa, onyń memlekettigi men táýelsizdigine qyzmet etken tulǵalar. Biraq olardyń kim ekeninen qazirgi jastar habarsyz. Kóshelerdiń bastalar jerinde jıyndar, kezdesýler ótkizip, kóshege esimi berilgen azamattyń kim ekeni, qandaı paıdaly ister atqarǵany jóninde túsindirý jumystary júrgizildi. Mysaly, Medeý aqsaqaldy alaıyq. Ol kim edi? Alǵashqy almanyń jańa túrin – aportty shyǵarǵan, qıyn jaǵdaıda qala turǵyndaryna bolysqan turmysty adam bolǵan.
Sol sıaqty, Qalı esimdi mesenatty alaıyq. Qalı Qaroı shatqalynda 12 myń bas qoı órgizdi, qystaýda birneshe qora saldyryp, tipti Vernyıdyń ózinde úlken áýleti bar úıi boldy. Onyń týǵan qyzy Qazaqstan Respýblıkasynyń halyq ártisi Gúljahan Ǵalıeva Almatyda «Gúlder» ansamblin qurdy. Qalı Orta Azıa, Sibir men Orynbor arasynda qoımen saýdany keńinen jolǵa qoıdy. Jyl saıyn Vernyıda (Almatyda) qazaq otbasylarynyń basyn qosyp tegin qoı taratyp otyrǵan, sóıtip Almatyda jergilikti turǵyndardyń turaqtanýyna jol ashqan qazaq. Osy óte mańyzdy tarıhty biz «Almaty aqshamy» basylymynan oqyp bildik.
«Almaty aqshamy» tulǵalardy eline, jerine qarap alalamaıtyn, qazaq memleketi men qazaq halqy úshin tókken terine, eren eńbegine qarap baǵalaıtyn basylym. «Birińdi qazaq, biriń dos, kórmeseń istiń bári bos» degen uly Abaıdyń sózin ustanǵan basylym. Sonysymen de tarıhy uzaq biraz basylymnan baǵaly. Nebári 35 jasqa kelgen «Aqshamǵa», onyń ujymyna uzaq ǵumyr tilep, burynnan kele jatqan ıgi ister, baǵaly bastamalar jalǵasyn taba bersin, baǵyttaryńnan aınymańdar degim keledi.