Amerıka Qurama Shtattary Qazaqstannyń búkil álemde ıadrolyq synaqtardy toqtatýdy qoldaý jónindegi tabandy ustanymy úlken qurmetke laıyq dep baǵalaıdy.
AQSH-tyń Memlekettik departamenti Semeı ıadrolyq polıgonynyń jabylǵanyna 30 jyl tolýyna oraı málimdeme jasady, dep habarlaıdy Almaty-akshamy.kz.
Bul týraly Qazaqstan prezıdentiniń baspasóz hatshysy Berik Ýálı óziniń facebook paraqshasynda jarıalady.
AQSH Memlekettik departamenti málimdemesinde Qazaqstandy Semeı ıadrolyq synaq polıgonynyń jabylýynyń 30 jyldyǵymen quttyqtady.
«Amerıka Qurama Shtattary Qazaqstandy Semeı ıadrolyq synaq polıgonynyń jabylýynyń 30 jyldyǵymen quttyqtaıdy. Polıgondy jabý týraly sheshim ıadrolyq qaýipsizdik pen ony taratpaýdy tolyq qoldaıtynyn kórsetedi. Qazaqstannyń Semeı polıgonyn jabý týraly sheshimi álemde beıbitshilikke qol jetkizýge baǵyttalǵan asa mańyzdy sharalardyń biri ári biregeıi boldy. Polıgon jabylǵannan beri Qurama Shtattar Qazaqstanmen birlesip keńestik ıadrolyq synaqtardan qalǵan ınfraqurylymdardyń qaldyqtaryn joıý boıynsha áriptestik ornatty. Jýyrda Degeleń taýyndaǵy ıadrolyq synaqtar júrgizilgen 181 jer asty ótkeli joıyldy, - delingen mátinde.
Sonymen birge AQSH Memlekettik departamenti Qazaqstannyń búkil álemde ıadrolyq synaqtardy toqtatýdy qoldaý jónindegi tabandy ustanymy úlken qurmetke laıyq dep baǵalady.
«Qazaqstannyń búkil álemde ıadrolyq synaqtardy toqtatýdy qoldaý jónindegi tabandy ustanymy úlken qurmetke laıyq. Bul rette Amerıka Qurama Shtattary Iadrolyq synaqtarǵa jappaı tyıym salý týraly kelisimdi qoldaıdy jáne osy maqsatqa jetý jolynda kezdesetin syn-qaterlerdi eskere otyryp, onyń iske asýyna kúsh salady.
Iadrolyq synaqtarǵa jappaı tyıym salý týraly kelisimniń maqsattaryna sáıkes Qurama Shtattar ıadrolyq synaqtarǵa moratorııdiń saqtalýyn jáne ıadrolyq qarýy bar barlyq memleketterdi moratorıı jarıalaýǵa nemese jalǵastyrýǵa úndeıdi. Biz Qazaqstan úkimetine turaqty seriktestigi úshin rızashylyǵymyzdy bildiremiz», - deıdi AQSH Memlekettik departamenti.