Aqsaı shatqalyndaǵy órt áli óshken joq
Almaty oblysynyń Aqsaı shatqalyndaǵy órt áli tolyqtaı óshirilgen joq. Almaty oblystyq Tótenshe jaǵdaılar departamentiniń baspasóz qyzmetinen málim etkendeı, jaqyn mańdaǵy eldi mekenderge tónip turǵan qaýip joq, dep habarlaıdy Almaty-akshamy.kz QazAqparat saıtyna silteme jasap.
«2021 jylǵy 29 qyrkúıekte saǵat 08-00-degi jaǵdaı boıynsha, Almaty oblysy Qarasaı aýdanynyń Aqsaı shatqalyndaǵy «İle-Alataý» MUTP aýmaǵyndaǵy bir ýchaskede azdaǵan byqsý jáne shymtezek tósenishiniń tútindeýi bar. Bul aımaqtyń aınalasynda jerdi qazý jáne jyrtý jumystary júrgizildi.
Órt ornynda Aqsaı orman sharýashylyǵynyń, "Qazavıaormanqorǵaý" jáne Almaty oblysynyń TJD kúshteri men quraldary jumys atqarýda. QR Tótenshe jaǵdaılar mınıstrliginiń «Qazavıaqutqarý» AQ tikushaǵy sý shashyp jatyr. Búgingi kúni tútindi joıýǵa 38 adam men 8 birlik tehnıka jumyldyryldy.
Eldi mekenderge qaýip joq. Eń jaqyn eldi meken – Qyrǵaýyldy aýyly 12 shaqyrym qashyqtyqta jáne "Radýga" baý-baqsha qoǵamy 8 shaqyrym qashyqtyqta ornalasqan», - delingen habarlamada.
Esterińizge sala keteıik, 26 qyrkúıekten bastap Almaty oblysy, Qarasaı aýdany, Aqsaı shatqalynda, «İle-Alataý» MUTP aýmaǵyndaǵy jetýi qıyn taýly jerlerde, bıiktigi 2000 metr jerde orman tósenishi, japyraqtardyń jáne qurǵaq shóp órtenip jatqanyn jazǵan bolatynbyz.