Prezıdent reformalary: aıtyldy – jasaldy
Qazirgi álem – aqparat álemi. Al onyń shyndyǵy memleketter men qoǵamdardan osy salaǵa jiti de jaýapkershilikpen qaraýdy talap etedi. Qazaqstan bar syn-qaterlerdi jaqsy túsinedi jáne aqparat keńistigin erkindikti tolyq qamtamasyz etetindeı jáne qaýipti haosqa jol bermeıtindeı etip damytýǵa umtylady.
Qazaqstan Konstıtýsıasynda: «Sóz ben shyǵarmashylyq erkindigine kepildik beriledi» delingen. Prezıdent (Konstıtýsıanyń kepili retinde) naýryz aıyndaǵy Joldaýynda bul taqyrypty damyta tústi. Ol elimizdegi odan ári demokratıalyq qaıta qurýlar táýelsiz jáne jaýapty buqaralyq aqparat quraldarynsyz múmkin emestigin aıtyp, «BAQ týraly» Zańdy «memleket múddesin, qoǵam suranysyn jáne medıasalany damytý úrdisterin eskere» otyryp, qaıta qaraý mindetin qoıdy.
«Mass-medıa týraly» jańa zań jobasynyń tujyrymdamasy jáne oǵan qatysty basqa da qujattar keńinen talqylaý úshin «Ashyq NQA» ınternet-portalynda ornalastyryldy. Osy zań qabyldanǵannan keıin BAQ týraly qoldanystaǵy zańnama 50 paıyzdan astamǵa jańartylady dep boljanyp otyr.
Ózgerister, atap aıtqanda, memleket pen BAQ arasyndaǵy ózara is-qımyldyń eskirgen tásilderin qaıta qaraýǵa baǵyttalǵan. Áńgime memlekettik aqparattyq tapsyrys tetigin túbegeıli transformasıalaý týraly bolyp otyr. BAQ-ty granttyq qarjylandyrý modeline kezeń-kezeńimen kóshýdi júzege asyrý usynylady. Jýrnalıser qoǵamdastyǵynyń qyzmetin quqyqtyq qamtamasyz etý máselelerine erekshe kóńil bólinedi. Jýrnalıserdi kásibı akredıtteýdiń jańa tetigi ázirlenýde.
Aqparattyq salada búginde sıfrlyq mass-medıa ústemdik quryp otyr. Ártúrli sarapshylyq ınstıtýttar qazaqstandyqtardyń jańalyqtardy qaıdan alatyny týraly jıi saýaldama júrgizedi. Osyndaı áleýmettik ólsheýlerdiń nátıjeleri mynadaı jalpy úrdisti kórsetedi: áleýmettik jeliler, blogerler, messendjerlerdegi aqparattyq arnalar jáne basqa da onlaın platformalar barǵan saıyn jańalyq kózderine aınalýda. Munyń qaýiptiligi sol, «jańa medıany» quqyqtyq retteýde áli kúnge eleýli olqylyq bar. Munyń ózi feıkterge, aıla-sharǵylarǵa, jaýapsyz aqparat jiberýge jaǵdaı jasaıdy. Jańa zańnama osy olqylyqtyń ornyn toltyrýǵa tıis.
2022 jyldyń taǵy bir mańyzdy epızody – Qazaqstannyń aqparattyq doktrınasynyń ázirlenýi. Bul qujat qazirgi zamanǵy syn-qaterler men qaýipter jaǵdaıynda memlekettik aqparattyq saıasattyń ıdeologıalyq quramdas bóligin aıqyndaıdy, aqparattyq salany odan ári yryqtandyrý baǵdarlaryn beredi. Doktrınanyń túpki maqsaty – memleket pen qoǵamnyń aqparattyq qaýipsizdigin qamtamasyz etý, otandyq BAQ-tyń básekege qabilettiligin arttyrý.