«Daýys» qoǵamdyq baıqaýshylar koalısıasy» Respýblıkalyq qoǵamdyq birlestiginiń Almaty qalasynyń fılıalynda baspasóz konferensıasy uıymdastyryldy.
BAQ ókilderine arnalǵan jıynda «Daýys» qoǵamdyq baıqaýshylar koalısıasy» Respýblıkalyq qoǵamdyq birlestigi 19 naýryz kúni ótetin saılaýǵa baqylaýshylardy daıyndaıtyn mektep óz jumysyn bastaǵanyn habarlady.
«Azamattyq, patrıotızm, quqyqtyq mádenıet, quzyrettilik – bul Qazaqstan Respýblıkasy Parlamenti Májilisiniń jáne barlyq deńgeıdegi máslıhattardyń depýtattaryn saılaýda búkil Saılaý rásimderiniń ashyqtyǵy men zańdylyǵy qamtamasyz etýge arnalǵan árbir baıqaýshyǵa tán bolýy tıis qajetti qasıetter. Almaty qalasynda 603 saılaý ýchaskesi bar (onyń ishinde 532-si ashyq) jáne 19 naýryzda, daýys berý kúni, oǵan myńdaǵan almatylyqtar saıası partıalar men ózin-ózi usynǵan depýtattyqqa eń laıyqty kandıdattarǵa daýys berý úshin keledi. Daýys berý rásiminiń ashyqtyǵyn, shynaıylyǵyn, obektıvtiligin jáne daýystardy sanaýdy qamtamasyz etý maqsatynda árbir saılaý ýchaskesinde táýelsiz baqylaýshylar bolady, olar jaýapty, saýatty jáne beıtarap túrde saılaý prosesiniń barlyq rásimderin qadaǵalaıdy», – dedi «Qoǵamdyq joba» mekemesiniń dırektory Aleksandr Bratenkov.
Sondaı-aq, ol aldaǵy saılaýda bolatyn erekshelikterdi aıtyp ótti.
«Qazir biraz jyldan keıin aralas saılaý júıesi qaıtadan jandanyp jatyr. Úmitkerler partıalyq tizimmen jáne birmandatty okýrg atynan óz-ózderin usyný arqyly saılaýǵa túsedi. Almatyda mundaı 3 saılaý okrýgi bar. Bir qyzyǵy, óz-ózin usynyp jatqan úmitkerler óte kóp. Ár okýrgte 40-tan astam kandıdat tirkeldi. Saılaýdaǵy taǵy bir erekshelik – baqylaýshylar endi akredıtasıadan ótý kerek. Buryn kez kelgen saıası partıanyń ne qoǵamdyq birlestik ókili baqylaýshy bola alatyn edi. Odan keıin qoǵamdyq birlestikter tirkeletin boldy. Bul saılaýda ár uıymnyń ókilderi akredıtasıadan ótýi qajet» – dedi ol.
«Almaty azamattyq alánsy» zańdy tulǵalar birlestiginiń tóraǵasy Qaıyrjan Abdyhalyqov baqylaýshylar mektebiniń jumys barysy týraly baıandady.
«Saılaý kezinde eń mańyzdy jumystardyń birin baqylaýshylar atqarady. Sońǵy ótken Prezıdent saılaýda Almatyda 2 myńnan astam derbes baqylaýshy tirkeldi, biz olardy oqyttyq. Osy baqylaýshylar mektebinde de tájirıbeli oqytýshylarymyz bolady. Óz isterin jaqsy biledi. Baqylaýshylar kýrsy 4 tarmaqqa bólinedi. Onyń ishindegi eń mańyzdysy quqyqtyq mádenıet bilý, ıaǵnı ár baqylaýshy zańnamany bilýi qajet», – dedi Q.Abdyhalyqov.
Jıynǵa qatysqan «Qoǵamdyq pikir» jáne «El erteńi» qoǵamdyq birlestikteri de aldaǵy saılaýda baqylaýshylardy daıyndaý úshin «Daýys» qoǵamdyq baıqaýshylar koalısıasy» Respýblıkalyq qoǵamdyq birlestigimen tyǵyz jumys jasaıtyndaryn aıtty.
