Bostandyq aýdany turǵyndarynyń ótinishimen aýdany 1 gektar jer ýchaskesi abattandyrylady
Almaty ákimi Erbolat Dosaev jumys sapary barysynda jáne Bostandyq aýdanynyń turǵyndarymen kezdesý aıasynda Abaı dańǵylynyń ońtústiginde jáne Gagarın dańǵylynyń batysynda ornalasqan 1 gektar aýmaqty abattandyrý josparymen tanysty, dep habarlaıdy almaty-akshamy.kz.
Bul bos jer ınfraqurylym nysanyna aınalyp, Almatynyń ońtústik bóligindegi qoǵamdyq keńistikterge mańyzdy oryn bolady. Qurylys jumystary bıyl 10 qarashada bastaldy jáne Almaty ákiminiń tapsyrmasyna sáıkes Bostandyq aýdany turǵyndarynyń ótinishimen qolǵa alynǵan. Aýmaqty abattandyrýda qoǵamdyq tyńdaýlarda jáne jobany talqylaý barysynda aıtylǵan dúnıelerdi eskeredi. Munda oıyn alańy, fýtbol jáne basketbol alańdary, skeıtpark, sonymen qatar, ıtterdi serýendeýge arnalǵan oryn bar kópfýnksıonaldy qoǵamdyq aımaq paıda bolady. Ýchastokta oryndyqtar, qoqys jáshikteri men pergolalar qoıylady. Aǵashtar otyrǵyzyp, sýarý júıesimen qamtamasyz etiledi. Aýmaqty abattandyrý jumystary áleýmettik jaýapkershilik aıasynda júrgiziledi.
Bostandyq aýdanynyń ákimi Sanjar Alın qala basshysyna búgingi kúni aǵashtardy sanıtarlyq maqsatta butaqtary kesilgenin, aǵash otyrǵyzyp, fýtbol alańy jóndelgeni týraly esep berdi. Qazirgi ýaqytta jumystyń 15%-y aıaqtaldy. Jobany 2024 jyldyń tamyzyna deıin aıaqtaý josparlanyp otyr.
Erbolat Dosaev aımaqtardy bólýdi eskerip, bos ýaqyt pen demalys alańdaryn qaıta qurýdy, qarttar men balalar úshin olardy abattandyrý, shatyrlar jasaýdy tapsyrdy. Qala basshysy jańa qoǵamdyq aýmaqtyń jobasy aýdannyń ınfraqurylymyn jaqsartyp qana qoımaı, jyldyń kez kelgen ýaqytynda otbasylyq demalys pen sporttyq is-sharalardyń jańa ortalyǵyna aınalatynyn atap ótti. Sonymen qatar, Almaty ákimine Abaı dańǵylynan Jandosov kóshesine deıin Gagarın býlvaryn qaıta qurý jáne abattandyrý jobasy tanystyryldy, bul 2024 jylǵa josparlanǵan.
Anyqtama úshin: Bostandyq aýdanyn abattandyrý aıasynda bıyl 80 aýla aýmaǵynda kúrdeli jóndeý jumystary aıaqtaldy. «Halyq qatysatyn búdjet» jobasy aıasynda 4 qoǵamdyq keńistikke, 10 sport jáne balalar alańyna jóndeý jumystaryn júrgizýdi kózdeıtin 800 mln teńgege 17 joba irikteldi. 12 jerasty jáne 7 jerústi jaıaý júrginshiler ótkeline aǵymdaǵy jóndeý jumystary júrgizilip jatyr. 2024 jylǵa «Atakent», «Iýjnyı» parkterin, Úlken Almaty jáne Esentaı ózenderiniń jaǵalaýlaryn, birqatar sýburqaqty jáne t.b. qamtıtyn Tuńǵysh Prezıdent saıabaǵyn kúrdeli jóndeý josparlanǵan.