«Aqjar» shaǵyn aýdanynyń turǵyndary úshin «Halyq qatysatyn búdjet» aıasynda jańa qoǵamdyq keńistik ashyldy
Erbolat Dosaev Naýryzbaı aýdanyndaǵy qoǵamdyq aımaqtardy abattandyrýdy tekserdi, dep habarlaıdy Almaty-akshamy.kz
Jumys sapary aıasynda Almaty ákimi Erbolat Dosaev Naýryzbaı aýdanynyń «Aqjar» shaǵyn aýdanynda «Halyq qatysatyn búdjet – 2023» baǵdarlamasy aıasynda salynǵan jańa qoǵamdyq keńistikke bardy. Qurylys bıyl 15 maýsymda bastaldy. Qazir barlyq jumys aıaqtaldy. Osy jyldyń kúzinde 50 dana qylqan japyraqty jáne japyraqty ekpelerdi otyrǵyzý josparlanǵan.
Qoǵamdyq keńistikti abattandyrý nátıjesin tekserý barysynda Erbolat Dosaev jergilikti turǵyndarmen áńgimelesti.
«Almatyda úlken saıabaq salý bos jerdiń bolmaýy qıyndyq týǵyzady, biraq turǵyndardyń jaılylyǵy úshin biz jergilikti deńgeıdegi saıabaqtar men skverler salyp jatyrmyz. Osyndaı mysaldardyń biri – Naýryzbaı aýdanyndaǵy turǵyndardyń demalysy úshin salynǵan jańa qoǵamdyq keńistik», - dedi Erbolat Dosaev.
Turǵyndar, óz kezeginde, aýdanda ómir súrý sapasyn odan ári jaqsartý boıynsha ózekti máselelerdi sheshkeni úshin, atap aıtqanda, «Aqjar» shaǵyn aýdanynyń halqyn aýyz sýǵa turaqty qoljetimdilikpen qamtamasyz etkeni úshin alǵystaryn bildirdi.
Turǵyndardyń saýaldaryna jaýap bere otyryp, megapolıs ákimi «Halyq qatysatyn búdjet» baǵdarlamasynyń tıimdiligin jáne qala turǵyndarynyń oń pikirin eskere otyryp, baǵdarlamany qarjylandyrý kólemi artatynyn habarlady. Bıyl Naýryzbaı aýdanyna qosymsha 875 mln teńge bólindi. Osylaısha, aýdanda 2,7 mlrd teńgeden astam somaǵa 67 jobany iske asyrý kózdelgen, onyń ishinde qoǵamdyq keńistikter men jaıaý júrginshiler aımaqtaryn abattandyrý, jol ınfraqurylymy, syrtqy jaryqtandyrý jelisi men aryq salý, sýarýdyń avtomattandyrylǵan júıesin ornatý boıynsha jobalar bar.
«Aqjar» shaǵyn aýdanyndaǵy qoǵamdyq keńistik buryn qaraýsyz qalǵan, aýdany 0,2 ga jerge salynǵan. Jergilikti turǵyndar ártúrli turmystyq jáne qurylys qaldyqtary jınalǵan aýmaqty birneshe ret tazartqan.
«Atalǵan qoǵamdyq keńistiktiń ashylýy «Aqjar» shaǵyn aýdanynyń turǵyndary úshin mańyzdy oqıǵa boldy: buryn mundaı alańdar men saıabaqtar bolǵan emes. Aýmaq úsh aımaqqa bólingen jáne balalar oıyn aımaǵy, sporttyq workout alańy, sonymen qatar, qala turǵyndary úshin demalys aımaǵy usynylǵan», - dedi Naýryzbaı aýdanynyń ákimi Názıra Toǵyzbaeva.