Erbolat Dosaev «Aqjar» turǵyndaryn sýmen úzdiksiz qamtamasyz etý boıynsha jumystardyń barysyn tekserdi, dep habarlaıdy Almaty-akshamy.kz
Naýryzbaı aýdanyna jumys sapary aıasynda Almaty ákimi Erbolat Dosaev «Aqjar» shaǵyn aýdanyn sýmen jabdyqtaýǵa arnalǵan kaskadty sorǵy stansıasynyń aýmaǵyna bardy.
«Naýryzbaı aýdanynda sýmen qamtamasyz etý problemasy aýdan aýmaǵy megapolıske qosylǵannan keıin paıda boldy jáne bul másele 10 jyldan astam ýaqytqa sozylyp keldi. Búginde sorǵy stansıasy salyndy. Basty mindet-turǵyndardyń aýyz sýǵa turaqty qoljetkizýin qamtamasyz etý. Biz júzege asyryp jatqan jobalar negizgi problemany – úılerdi sýmen jabdyqtaýdyń taýdaǵy sý kózderine táýeldi bolmaýyn sheshýge múmkindik beredi», - dep atap ótti Erbolat Dosaev.
Qurylys jumystary osy jyldyń mamyr aıynda bastaldy. 1 tamyzda stansıa paıdalanýǵa berildi. Qazirgi ýaqytta sý berý shtattyq rejımde júzege asyrylýda.
«Aqjar sorǵy stansıasy Aqjar shaǵyn aýdanyn sýmen jabdyqtaýdy qamtamasyz etedi. Negizgi tehnologıalyq sıkl «Premera» sorǵy stansıasynan bastalady. Biz sýdy Aqjar shaǵyn aýdanyna beremiz, eger kósheler boıymen qaraıtyn bolsaq, Tashkent kóshesinen Jandosov kóshesine deıin. 1 tamyzdan bastap sý berý qamtamasyz etildi. Sondaı-aq, Aqjar sh / a sý jáne káriz jelilerin tóseý jumystary júrgizilýde, olar 80%- ǵa oryndaldy. Jumystardy aǵymdaǵy jyldyń qyrkúıek aıynyń sońyna deıin aıaqtaýdy josparlaýdamyz», - dedi Energetıka jáne sýmen jabdyqtaý basqarmasynyń basshysy Talǵat Malybaev.
16 tamyzdaǵy jaǵdaı boıynsha «Aqjar» shaǵyn aýdany aýmaǵynyń 70% - y nemese 3600-ge jýyq jeke úı, sondaı-aq kópqabatty turǵyn úı qurylystary men bilim berý mekemeleriniń ǵımarattary jyl boıy sýǵa úzdiksiz qoljetkizdi. Sýmen jabdyqtaýdyń jańa jelilerin salý boıynsha qurylys-montaj jumystarynyń aıaqtalýyna qaraı birqatar kóshelerdiń abonentteri qosylady. Nysan jobalyq qýattylyqqa shyqqannan keıin 22 myńnan astam turǵyny bar shaǵyn aýdannyń 5 myńǵa jýyq úıi aýyz sýmen qamtamasyz etildi. 2023 jyldyń sońyna deıin Qarǵaly ózeninde jańa súzgi stansıasynyń qurylysy, 2025 jyldyń sońyna deıin Aqsaı ózeninde osyndaı súzgi stansıasynyń qurylysy aıaqtalady.
Munyń bári Naýryzbaı aýdanynyń, sondaı-aq Almaty oblysynyń 150 myń turǵynyn turaqty sýmen qamtamasyz etýge múmkindik beredi.
Joba bıznestiń áleýmettik jaýapkershiligi aıasynda «Qazaq Stroy Almaty» JSHS-men birlesip qolǵa alynǵan.
«Tereńdigi 300 metr 5 skvajına burǵylandy, sorǵy stansıasy ornatyldy jáne Alataý-Abaıdyń ekinshi kótergish sorǵysyna sý jınaldy. Munda 5-10 myń tekshe metr sý jınaıtyn eki rezervýar salyndy. Sondaı-aq, «Aqjarǵa» sý jiberetin sorǵy stansıasy ornatyldy. Sýmen úzdiksiz qamtamasyz etý úshin biz táýligine saǵatyna 360 tekshe metr sý jiberemiz. Bul sorǵy stansıasy qazir toqtaýsyz jumys isteıdi», - dedi «Qazaq Stroy Almaty» JSHS bas energetıginiń orynbasary Tólegen Janǵurbaev.
Júrgizilgen jumys barysyn tekserýdi qorytyndylaǵan qala ákimi Erbolat Dosaev aýdan turǵyndaryn sapaly jáne úzdiksiz sýmen qamtamasyz etý jumystaryn erekshe baqylaýda ustaýdy tapsyrdy.
Anyqtama:
«Aqjar» shaǵyn aýdanyn sýmen jabdyqtaý jazda baý-baqsha sharýashylyqtary júzege asyratyn sýarý sebebinen sý tapshylyǵyna baılanysty kúrdelengen edi. Sonymen qatar, aýyz sýdy jetkizýdegi úzilister aýa-raıynyń qolaısyzdyǵy jáne Aqsaı ózenindegi sýdyń laılaný konsentrasıasynyń artýy oryn alyp, ony sý alýǵa jaramsyz etti. Mundaı kezeńderde sýmen jabdyqtaý aınalyp ótý jelisi boıymen júzege asyryldy.