Amerıkandyq dárigerler biregeı operasıa jasady.
Operasıa tósek tartyp jatqan naýqastyń qozǵalýyna múmkindik berdi. Bul úshin mamandar mıǵa birneshe chıp ornatqan, dep habarlaıdy Almaty-akshamy.kz 24.kz-ke silteme jasap.
Aq halattylar, bolashaqta mundaı ádistiń kómegimen sal aýrýy, sańyraýlyq sekildi dertti emdep, myńdaǵan adamǵa, úmit syılaýǵa bolatynyn aıtady. Bul Nú-Iork shtatynyń turǵyny Kıt Tomas. Qazir ol qolyn qozǵalta alady. Sıpap-sezine alady. Munyń ózi bir ǵanıbet deıdi Kıt. Óıtkeni 3 jyl boıy tósek tartyp jatqan ol buryn múlde qozǵala almaıtyn. Sondyqtan kópshilik aldynda sóz sóılegende qýanyshyn jasyra almaı, kózine jas alyp jatyr.
2020 jyly Kıt baseınge sekirgen kezde omyrtqasyn zaqymdap alǵan. Sol ýaqyttan beri tósek tartyp jatyp qalǵan. Biraq jýyrda amerıkalyq dárigerler oǵan biregeı operasıa jasady. Olar er adamnyń mıyna 5 shaǵyn chıp ornatqan. Sóıtip mıkroelektrodty ımplantattyń kómegimen bas mıy men julynyn baılanystyrdy desek bolady. Sonyń nátıjesinde jasandy ıntellekt Kıttiń oılaryn elektr sıgnaldaryna aınaldyryp, ony bulshyqeti men julynǵa baǵyttap otyrady.
Kıt Tomas, naýqas: "Men buryn Nú-Iorktiń Manhetten aýdanynda turatynmyn. Qarjy kompanıasynda jumys istegem. 18-shilde ómirimdi ózgertken kún boldy. Ol koronavırýs pandemıasynyń kezi edi. Dostaryma qonaqqa barǵam. Sýǵa túsemin dep, osyndaı jaǵdaıǵa tap boldy. 8 aı boıy aýrýhanada jattym. 3 jyl buryn jaraqat alǵannan keıin dárigerler maǵan endi eshqashan qozǵala almaıtynymdy aıtqan. Maǵan mynadaı múmkindik bergen dárigerler myń alǵys."
Mundaı nátıjege qol jetkizý úshin 45 jastaǵy er adamǵa kúrdeli operasıa jasaldy. Ol 15 saǵatqa jalǵasqan. Bul ýaqyt ishinde dárigerler birneshe ret Kıtty narkozdan oıatyp otyrǵan. Osylaısha naýqaspen sóılesip otyryp, operasıanyń durys ótip jatqanyn qadaǵalap otyrǵan.
Chad Býton, Faınshteın atyndaǵy bıoelektrondy medısına ınstıtýtynyń profesory: "Bul ádisti kóp jerde qoldanýǵa bolady. Mysaly, adamnyń julyny zaqymdanǵanda ǵana emes, ınsýltke ushyraǵan naýqastarǵa kóp kómegi tıýi múmkin."
Búkil álem dárigerleri muny biregeı operasıa dep otyr. Endi bolashaqta "aqyldy chıpterdiń" kómegimen sańyraýlyq, skleroz, sal aýrýy sekildi derti emdeýge bolatynyn aıtady.