Qazaqstan Prezıdenti Qasym-Jomart Kemeluly Toqaevtyń «Qazaqstan» ulttyq telearnasyna bergen suhbaty Almaty qalalyq ardagerleri tarapynan qyzý talqyǵa túsip, óte jaqsy pikirge ıe boldy. Ásirese, memleketimizdi saqtap qalý men onyń turaqtylyǵy týraly aıtqan tujyrymdary jurtshylyq kóńilinen shyǵyp, kókeıge qonymdy boldy.
Shyndyǵynda terrorıst qaraqshylardyń el Konstıtýsıasy men onyń zańdylyq normalaryn óreskel buza otyryp, beıbit sherýshilerdiń alańǵa shyǵýyn óz maqsattaryna paıdalanyp, eldegi Konstıtsıalyq qurylymdy buzyp, memleketti qulatpaq bolǵany, eldegi bılikti tóńkerýge jasaǵan taǵylyq áreketteri eshbir aqylǵa syımaıdy.
Kezinde Almaty qalasynan saılanǵan senator retinde men UQSHU Parlamenttik Assambleıasynyń Saıası máseleler jónindegi jáne halyqaralyq qatynastar komısıasynyń tóraǵasy retinde Ujymdyq qaýipsizdik týraly shart uıymynyń qyzmetimen tikeleı aralastym. Osy uıymnyń quqyqtyq máselelerin uıymdastyrýshylardyń biri retinde birqatar mańyzdy qyzmet atqardym. Bul halyqaralyq uıym osyndaı fors-majorlyq, ıaǵnı kútpegen jaǵdaılarda saıası, áskerı jáne basqa máselelerdi utymdy sheshýge atsalysý bolyp tabylady. Ujymdyq qaýipsizdik týraly shart uıymy osy bedeldi uıymǵa múshe elderdiń turaqtylyǵy men beıbit ómirin qamtamasyz etýde mańyzdy mindetter atqarady.
Osylaısha Prezıdent Qasym-Jomart Toqaev óz suhbatynda aıtyp ótkendeı, qańtar qasireti barysynda Ujymdyq qaýipsizdik shart uıymyna múshe qurylymdaryn Qazaqstanǵa shaqyrýy qajettilik jáne der kezinde qabyldanǵan oń sheshim boldy dep oılaımyz.