Sınoptıkter osy jazdaǵy aýa-raıy 43 gradýsqa deıin kóteriledi degen boljam aıtýda. Iaǵnı aldaǵy ýaqytta aptap ystyq ádettegideı qatty bolmaq.
Qalalyq N8 emhana dırektorynyń emdeý jumysy jónindegi orynbasary Gúlmıra Baıchýlakova aptap kezinde ár adam, ásirese kún ysysa densaýlyǵy syr beretin kisiler saqtaýǵa tıis erejelerdi aıtyp berdi.
— Kún qatty ysyǵanda tipti deni saý adamnyń demi tarylyp, júregi qaǵa bastaıdy, aýa jetpeı, basy aınalyp, keýdesi qysýy múmkin. Óıtkeni ystyq jaz júrekke aýyr tıedi. Júrek-qan tamyrlary aýrýy bar adamdar osy mezgilde asa álsiz, degenmen deni saýlar da abaı bolǵany jón, - deıdi dáriger.
Dáriger keńesteri:
* Saǵat 12.00 men 16.00 arasynda dalaǵa shyqpaýǵa tyrysyńyz. Al syrtta júrýge májbúr bolsańyz, kóleńke tasalap, ara-tura sákige otyryp demalyńyz.
* Túsi ashyq, ystyqtatpaıtyn-terletpeıtin kıim kıip júrińiz.
* Jaǵasy, beli qysatyn kıimnen bas tartyńyz.
* Et pen mal maıyn azyraq jeýge tyrysyńyz. Sút pen kókónisten jasalǵan taǵamdardy tutynǵan jón. Rasıonyńyzdaǵy aqjelken, kınza, askókti molaıtyńyz. Qatty toıyp tamaq jemeńiz. Tuzdy azaıtyńyz.
* Kóbirek sý ishińiz. Biraq gazdalǵan jáne óndiristik kvastan paıda bolmaıtynyn eskerińiz. Eń jaqsysy – taza sý, mors, kók shaı. Sonymen qatar jebirshóp, jalbyz, melıssany qaınatyp, tundyryp, lımon men muz kesekterin qosyp ishý densaýlyqqa paıdaly. Al quramynda az bolsa da alkogoli bar syra, kokteıl, sharap aǵzanyń sýsyzdanýyna ákeletinin esten shyǵarmańyz.
* Jaǵajaıda bolǵanda sýǵa súńgip ketýge asyqpańyz. Dene temperatýrasynyń kúrt aýytqýynan júrek shydamaı, talyp ketýi yqtımal. Mundaı jaǵdaı tipti jas, saý adamda bolýy múmkin.
* Kúni boıy kóshede júrgende búrikkishpen sý sebinip otyrýǵa bolady. Onyń ishine jyly sý quıyp alyńyz – salqyn sýǵa qaraǵanda terige sol paıdalyraq.