Jazǵy olımpıada tarıhyndaǵy bıylǵy dodaǵa elimizdiń atynan 80 sportshy qatysady.
Olımpıadanyń ashylý saltanatynda Qazaqstannyń Týyn alyp shyǵý qurmeti boksshy Aslanbek Shymbergenov pen jeńil atlet Olga Safronovaǵa berilgen.
26 shilde men 11 tamyz aralyǵynda barlyq sport túrinen jarystardy elimizdiń Qazaqstan, Qazsport, "Habar", "El arna", Jibek Joly telearnalary tikeleı efırde kórsetedi.
Qazaqstan atynan bıylǵy Olımpıada oıyndaryna barǵan 80 sportshynyń 54-i birinshi ret qatysady.
«Báıge berem jyǵylǵan palýanǵa da...»
QR mádenıet jáne sport mınıstriniń buıryǵyna sáıkes, sportshynyń alǵan júldesine baılanysty syıaqy somasy 3 myńnan 250 myń dollarǵa deıin bolady. Tólemder tek medal ıelerine ǵana emes, tórtinshi, besinshi nemese altynshy oryndardy ıelengenderge de beriledi. Degenmen, bul jaǵdaıda syıaqy aıtarlyqtaı az bolady. Sondaı-aq tólemderdiń mólsheri Olımpıada, Paralımpıada jáne Sýrdlımpıada oıyndarynyń sportshylary úshin birdeı bolmaq.
Birinshi, ekinshi jáne úshinshi oryndarǵa ıe bolǵan sportshylarǵa sáıkesinshe 250 myń, 150 myń jáne 75 myń AQSH dollary tólenedi.
Al medal berilmeıtin tórtinshi, besinshi jáne altynshy oryndar úshin memleketten sáıkesinshe 30 myń, 10 myń jáne 5 myń AQSH dollary kóleminde aqshalaı syıaqy qarastyrylǵan.
Olımpıada jaıly derekter
Jazǵy olımpıada buǵan deıin 32 ret ótken.
Parıj buǵan deıin 1900 jáne 1924 jyldary jazǵy Olımpıada oıyndaryn qabyldaǵan bolatyn jáne 2024 jylǵy oıyndar aıaqtalǵannan keıin Londonnan keıin úsh ret jazǵy Olımpıada oıyndaryn qabyldaǵan ekinshi qalaǵa aınalady.
Qazirgi oıyndarǵa irikteý týrnırleri shilde aıynyń basyna deıin ótti, al qazaqstandyq sportshylar irikteý kezeńin 25 sport túri boıynsha 80 lısenzıamen aıaqtady. Bul oıyndar Qazaqstan úshin táýelsizdik alǵannan beri segizinshi Olımpıada bolady.
Úkilegen úmitter
Halyqaralyq Olımpıada komıteti Parıjdegi Olımpıada oıyndaryna qatysatyn qazaqstandyq tanymal sportshylardyń tizimin jarıalady. Bul tizimge barlyǵy 12 sportshy engen. Biraq tenısshi Elena Rybakınanyń densaýlyǵyna baılanysty qatyspaıtyny keshe málim boldy.
Tizimge engender elimiz júldeden úmitti sanap otyrǵan sportshylar. Olardyń qatarynda boksshy, dúdoshy, sporttyq gımnastıka, tenıs, jeńil atletıka, semserlesý jáne kúres túrleriniń ókilderi bar.
Nazym Qyzaıbaı – boks, 50 kılo
48 kıloǵa deıingi salmaqta 2014 jáne 2016 jyly álem chempıony atanǵan otandasymyz alǵash ret Olımpıada oıyndarynda baq synaıdy. Buǵan deıin birde bir ret joly túspegen edi.
Valentına Halzova – boks, 75 kılo
69 kıloǵa deıingi salmaqta 2016 jyly álem chempıony bolǵan Valentına da alǵashqy Olımpıadasyna qatysady.
Sáken Bıbosynov – boks, 51 kılo
Myrzaǵalı Aıtjanov shákirti ekinshi Olımpıadasyna attandy. 2021 jyly Tokıoda qola júldeger atanǵan. Bul joly altyn alýdy basty maqsat tutady.
Ábıba Ábýjaqynova – dzúdo, 48 kılo
Dzúdo reıtıńinde úshinshi turǵan Ábıba da alǵashqy Olımpıadasynda baq synaıdy. Ol keıingi eki birdeı álem chempıonatynda qola júlde jeńip alǵan edi.
Eldos Smetov – dzúdo, 60 kılo
Ulttyq quramadaǵy eń tájirıbeli dzúdoshy osyǵan deıin eki Olımpıada oıyndarynda qorjynymyzǵa júlde salǵan. 2016 jyly Rıoda kúmis alsa, 2021 jyly Tokıoda qola medaldy qanaǵat tutty. Eldos úshin Parıj Olımpıadasyna barý ońaı bolǵan joq. Reıtıńilik jarystardan bólek, ózara ótken ishki beldesýler arqyly da myqtyny anyqtady.
Mılad Karımı – sporttyq gımnastıka, kópsaıys
2023 jylǵy álem chempıonatynda Mılad Qazaqstan quramasyna tarıhı júlde syılady. Ol erkin jattyǵýda qola júldeger atandy. 26 jastaǵy sportshy ekinshi Olımpıadasynda baq synaıdy.
Nora Djerýto – jeńil atletıka, 3000 metrge kedergilermen júgirý
Kenıalyq jelaıaq 2022 jyldyń qańtar aıynan bastap Qazaqstan atynan jarystarǵa qatysýǵa múmkindik aldy. Sol jyly álem chempıonatynda tarıhı altyn júldege qol jetkizdi, rekord jańartty. Keıinnen dopıng daýyna iligip, jarystardan ýaqytsha shettetildi.
2024 jylǵy 25 maýsymda halyqaralyq arbıtrajdyq sot sheshim shyǵardy. Olardyń sheshimi boıynsha World Athletics-tyń 2023 jylǵy 24 qarashada dopıng qoldanýy jaıly bergen apelásıasyn qabyldamady. Osylaısha ulttyq qurama sportshysy kúdikten tolyǵymen aqtaldy.
Rýslan Qurbanov – semserlesý, shpaga
2023 jyly álem chempıonatynda júlde alǵan sportshy Qazaqstan quramasyna tarıhı jetistik syılady. Ol ekinshi Olımpıadasynda baq synaıdy.
Aıdos Sultanǵalı – grek-rım kúresi, 60 kılo
Balýan eki ret álem chempıonatynda qola júldeger atandy. Alaıda alǵash ret Olımpıada oıyndarynda baq synaıdy. Tórtjyldyqtyń basty dodasyna qatysýdy 15 jasynan bastap armandaǵan.
Demeý Jadyraev – grek-rım kúresi, 77 kılo
Qazaq balýany 2017 jyly álem chempıonatynda 71 kıloǵa deıingi salmaqta kúmis aldy. Tokıoda 77 kıloǵa deıingi salmaqta beldesip, júldege ilikpedi. Parıjde de osy salmaqta boz kilemge shyǵady.
Azamat Dáýletbekov – erkin kúres, 86 kılo
2022 jáne 2023 jylǵy álem chempıonatynda qola júldege qol jetkizgen Azamat óz salmaǵynda favorıtter qatarynda. Alǵashqy Olımpıadasynda júlde úshin kúresedi.
Olımpıadanyń búdjeti qansha?
Parıj-2024 olımpıadasynyń bastapqy búdjeti, ıaǵnı tapsyrys bergen kezdegi jalpy quny 6,2 mıllıard evro dep baǵalanǵan. IFRAP táýelsiz saraptama ortalyǵynyń málimeti boıynsha qazir bul soma 2 eselengen. Qazir 2024 jylǵy olımpıada oıyndarynyń búdjeti 11 mlrd evro ekeni belgili boldy. Parıj olımpıadasynyń ashylý saltanatynyń quny 122 mıllıon evro.