Almatynyń haıýanattar baǵynyń janýarlary shilińgir shildeniń aptabynan qalaı qorǵanyp jatyr?
Zoobaq qyzmetkerleri janýarlardy tamashalaýǵa kelgen adamdar tarapynan osyndaı suraqtar jıi qoıylatynyn aıtty. Sol sebepti de olar ózderiniń áleýmettik jelidegi paraqshalarynda vıdeo jarıalady, dep habarlaıdy Almaty-akshamy.kz.
"Kún ystyq, qapyryq... Kóp adamdar zoobaqtaǵy janýarlar aptap ystyqqa qalaı shydaıdy dep suraq qoıady. Bizdegi janýarlardyń barlyǵy qajetti sýmen qamtamasyz etilgen. Biraq, haıýanattar baǵyna kelýshiler janýarlarǵa arnalǵan sý quıatyn ydystardy baıqaı bermeıdi. Mysaly, ıagýar, leopard, pýma, túlki, qasqyrlarǵa beriletin sýlar tehnıkalyq aımaqta ornalastyrylǵan ydystarda bolady. Ol jerdegi sýlardy jıi aýystyryp turýǵa qaýipsiz ári yńǵaıly. Tehnıkalyq aımaqtaǵy sýlar taza ári salqyn bolyp turady. Sondyqtan, sýlardy biz negizinen úıshikterge, kóleńkege qoıamyz", - delingen jazbada.
Borsyq, aq aıý, jolbarystar baseınde shomylǵandy jaqsy kóredi. Al, pilder úshin arnaıy sensorly dýsh ornatylǵany aıtyldy.
Instagram áleýmettik jelisinde jarıalanǵan vıdeoda shımpanze balmuzdaq jep otyrǵany, pil dýshqa túsip jatqany jáne arystandardyń ústine sý shashylyp jatqany kórsetilgen.