Jylý jelilerine qatysty máseleler sheshildi.
Premer-Mınıstrdiń orynbasary - Saýda jáne ıntegrasıa mınıstri Serik Jumanǵarınniń boljaýynsha, apta sońyna deıin Ekibastuzdaǵy barlyq úıge jylý beriledi, dep habarlaıdy Almaty-akshamy.kz QazAqparatqa silteme jasap.
Mınıstr jylý óshirilgende aqpaı qalǵan sýlar qubyrda qatyp qalǵanyn aıtty.
«Sondyqtan jylý berý kezinde batareıalar jaryla bastady. Iaǵnı, jylý úılerge jetkizildi, jylý jelilerine qatysty máseleler sheshildi. Endigi másele turǵyn úılerdiń ishinde. Qazir oqıǵa ornynda júrgender batareıalardy, krandardy, ishki jylytý júıelerin aýystyrýǵa bar kúshin salyp jatyr. Sondyqtan bul másele aldaǵy eki kúnde sheshiledi dep oılaımyn», - dedi S. Jumanǵarın Úkimette tilshilerge bergen suhbatynda.
Serik Jumanǵarınniń aıtýynsha, Ekibastuzda Premer-Mınıstrdiń birinshi orynbasary Roman Sklár, Energetıka vıse-mınıstri Jandos Nurmaǵanbetov, «Ortalyq Azıa energetıkalyq korporasıasy» AQ (OAEK) quryltaıshylarynyń biri júr.
«Aldymen máseleni tolyq sheship, jylýdy barlyq páterge jetkizý kerek, batareıalardy jóndeý kerek. Sodan keıin ǵana kináliler atalady, kináliler ókinedi dep oılaımyn», - deıdi vıse-premer.
Buǵan deıin Serik Jumanǵarın Aleksandr Klebanovtyń Ekibastuz JEO-syn memleketke bir teńgege satýǵa daıyndyǵy týraly pikir bildirgen edi.