Qazaqstandyq delegasıa Dúnıejúzilik banktiń shaqyrýymen Ońtústik Koreıaǵa baryp, qoǵamdyq kólik pen aqyldy tehnologıalar jumysymen tanysty.
Qonaqtar júrgizýshisiz júretin taksıge otyryp kórdi. Seýl merıasynda ótken semınardyń negizgi taqyryptarynyń biri – Almatydaǵy keptelis máselesin sheshý boldy, dep habarlaıdy Almaty-akshamy.kz 24.kz-ke silteme jasap.
Ákimdik qyzmetkerleriniń aıtýynsha, Qazaqstandaǵy eń iri qalada jarty mıllıonǵa jýyq kólik bar, biraq basqa aımaqtardan keletin mashınalardy qosa eseptese, avtomobılder sany 700 myńǵa jetedi. Seýl merıasynyń ókilderi Almaty joldaryndaǵy keptelis máselesin sheshýge bolatynyn aıtty.
«Qalalyq jerlerdegi keptelisterdi azaıtý úshin biz aqyldy baǵdarsham júıesin qurýdy josparlap otyrmyz. Qazir bul júıe 98 qıylysta jolǵa engizilgen dachıkterge negizdelip jumys isteıtin baǵdarshamdardy basqaryp tur. Biz basqa júıelerdi de qarastyryp jatyrmyz, olardyń biri - beınekameralardy qoldaný. Iaǵnı, avtomobılderdi taný júıesi keptelisterdi azaıtýǵa kómektesedi», - deıdi Almaty qalasy Sıfrlandyrý basqarmasy basshysynyń orynbasary Serik Baıǵanın.
«Eger jolaýshylar jeke kóliktiń ornyna qoǵamdyq kólikti tańdasa, keptelisti azaıtýǵa bolady. Ol úshin, biz Seýlde ártúrli ınovasıalardy engizdik. Mysaly, kez-kelgen avtobýsta, metroda, taksıde jol aqysyn bir kartamen tóleýge bolady. Ár avtobýstyń, metro poıyzynyń qaı jerde ekenin jáne aıaldamaǵa qashan qashan keletinin telefon arqyly kórýge bolady. Biz sondaı-aq jeke avtomobılderdiń qalalyq ortalyqtaǵy keıbir aımaqtarǵa kirýin shekteımiz. Eger mundaı saıasat Almatyda engizilse, meniń oıymsha, avtomobıl sanyn jáne keptelisterdi azaıtýǵa bolady», - deıdi Seýl qalasy Jobalar agenttiginiń atqarýshy dırektory Lı Djon Hen.