Prezıdent tótenshe jaǵdaı kezinde jumys istegen ekibastuzdyqtardy marapattady.
Byltyr 27 qarashada Ekibastuz qalasyndaǵy jylý jelilerinde apat bolyp, 149 turǵyn úı bir mezette jylýsyz qalǵan edi. Birden tótenshe jaǵdaı jarıalanyp, barlyq kúsh apat saldaryn joıýǵa jumsaldy. Sol syn saǵatta baspanalarǵa qaıta jylý berilýi úshin qarapaıym jumysshylar aıanyp qalmady, dep habarlaıdy Almaty-akshamy.kz inbusiness.kz-ke silteme jasap.
Qıyn-qystaý kezeńde kúni-túni eńbek etken 50-ge jýyq azamat Alǵys aıtý kúni syı-qurmetke bólendi. Pavlodar oblysynyń ákimi Asaıyn Baıhanov Ekibastuz qalasyndaǵy «Qaınar» demalys–bilim berý kesheninde ótken saltanatty jıynda ár salada eseli eńbek etip júrgen oblys turǵyndaryna, belsendi azamattyq ustanymyn bildirip júrgen jurtshylyqqa rızashylyǵyn bildirdi. Ásirese, qıyn-qystaý kezeńde bir úıdiń balasyndaı jumylyp, qalany jylýmen qamtýǵa baryn salǵan jumysshylarǵa, aýyrtpalyqqa tózimdilik tanytqan qala turǵyndaryna alǵys aıtty.
Osy oraıda Ekibastuz qalasyndaǵy tótenshe jaǵdaıdyń saldaryn joıýǵa belsendi qatysqan 19 azamatqa Qazaqstan Respýblıkasy Prezıdentiniń Jarlyǵyna sáıkes «Eren eńbegi úshin» medali tabystaldy. Olardyń qatarynda «Zýev» jeke kásipkerliginiń santehnıgi Vladımır Kýznesov bar. Ol alǵashqylardyń biri bolyp jylýsyz qalǵan turǵyn úılerdiń jertólesinde jaǵdaıdy retteý úshin jumys istedi.
«Toǵyz táýlik boıy uıyqtamaý ońaı bolǵan joq. Qubyrlardy jylytyp, úıdi jylýǵa qaıta qosyp otyrdyq. Úıge tań ata ústimiz sý bolyp oralatynbyz. Keı kezderi úıimizge jetkenshe ol muz bop qatyp qalatyn. Táýligine ary ketse bir saǵat qana uıyqtadym. Sebebi alańsyz jatatyn ýaqyt bolǵan joq. Qazir sol qıyn kezeń artta qaldy. Shyny kerek, ony eske alǵym da kelmeıdi», - deıdi Vladımır Kýznesov.
Sonymen qatar, 27 turǵynǵa Prezıdenttiń Alǵys haty tabystaldy. Al tótenshe jaǵdaı kezinde jylýsyz qalǵan turǵyndardy tegin ystyq tamaqpen qamtyp, qonaq úıden oryn bergen «Savoy» meıramhanasynyń dırektory Shattyq Súıinisheva «Oblys aldynda sińirgen eńbegi úshin» belgisimen marapattaldy.