Almaty qalasyndaǵy Alatau creative hub ortalyǵynda «Aıagúl» kitabynyń tanystyrylymy jáne Aıagúl Mantaı shyǵarmashylyǵyna arnalǵan ádebı kesh ótti.
Osydan bir jarym jyl buryn ómirden mezgilsiz ótken talantty jazýshy, «Serper» syılyǵynyń, Prezıdent stıpendıasynyń ıegeri Aıagúl Mantaı shyǵarmashylyǵyna arnalǵan ádebı keshke jýrnalıser, qalamgerler, Aıagúldiń dostary qatysty.
«Aıagúl shyǵarmalaryna taldaý jasaǵan edim. Onyń jazýshylyq deńgeıi joǵary bolatyn. Jastardyń arasynda qalam ustaıtyndar kóp negizi. Biraq solardyń barlyǵy myqty jazýshy emes qoı. Talaby jaqsy, nıeti kúshti, biraq talanty jetpeıtin qalam ustaıtyndar da bar. Al Aıagúl bolsa ádebıetke, prozaǵa óziniń únimen aqyryn ǵana aıańdaı basyp kelip, oqyrmandardyń júreginen erekshe oryn alǵan bolatyn. Talantty eńbekpen ushtastyrǵan jazýshy, jýrnalıs edi», – deıdi jazýshy, ǵalym Nurdáýlet Aqysh.
Almatydaǵy keshten keıin qazaq ádebıetindegi qyzdardy qoldaý maqsatynda «Aıagúl Mantaı atyndaǵy syılyq» beriletin boldy. Bul týraly Aıagúlmen bir topta birge oqyǵan jastar aqyldasyp sheshken eken. Tipti kásipker, Aıagúlmen jaqyn aralasqan Baqtygúl Qambarova atalǵan syılyqtyń qarjylaı júldesin jyl saıyn berýdi óz moınyna alatynyn aıtty.
«Aıagúldiń kitabyn shyǵarýǵa aqyn, qoǵam qaıratkeri Maqpal Mysa óz úlesin qosty. Ol kitaptyń muqabasyna, bezendirilýine deıin kóńil bólip, bar sharýasyn qadaǵalap otyrdy. Aqpan aıy Aıa Mantaı fenomenine arnaldy. 14 aqpan kúni kitaptyń tolyq tırajyn aldyq, bir aıda úsh qalada – Astana, Shymkent, Almaty qalalarynda ótti. Ár qalada kesh ózinshe ózgeshe ótti. Astanada Aıagúldiń beınesi kóbirek ashyldy dep keldi ótkizgen qyzdar. Shymkentte «asylymyzdy aıalaı almadyq» dep júrgen jerlesteri sezimge toly, jyly kesh ótkizdi. Al Almatydaǵy keshte negizinen talanttyń taǵdyryna qoǵamnyń áserin kóbirek aıttyq. Aıagúldiń shyǵarmalary arqyly ekinshi ómiri bastaldy. Qurbysy retinde boıymnan bir aýyr júk túskendeı jeńildedim», – deıdi qurbysy Baný Ońdasynova.
«Aıagúl» dep atalatyn kitapty Aıagúl Mantaıdyń ómirde jaqyn, syrlas dosy bolǵan Baný Ońdasynova qurastyrǵan. Kitaptyń birinshi bóliminde Aıagúldiń jaqyn aralasqan dostarynyń, Máskeý joǵary oqý ornynda birge oqyǵan dostary men qalamdastarynyń estelikteri jáne Aıagúldiń jýrnalıserge bergen suhbattary engizilgen. Ekinshi bólimde Aıagúldiń qalamynan týǵan barlyq áńgimesi berilgen.
