Pavlodarda úıler súrile bastady
Ertis óńirindegi Zaton shaǵyn aýdanynda ornalasqan apatty úıler súrile bastady. Aldaǵy jyldary osy aýmaqta birneshe kópqabatty úı boı kóteredi, dep habarlaıdy Almaty-akshamy.kz BAQ.KZ-ke silteme jasap.
Shaǵyn aýdandaǵy eki qabatty aǵash úıler ótken ǵasyrdyń 30-50-shi jyldary salynǵan. Ýaqyt óte kele komýnaldyq jelileri isten shyǵyp, apatty dep tanylǵan. Qulaýdyń shaq aldynda turǵan baspana ıeleri buǵan deıin jergilikt bılikke shaǵymdanyp kelgen. Búginde tóbesi opyrylyp, qabyrǵasy sógilgen páterlerdiń keıbireýleri bos tur. Sebebi, turýǵa qolaısyz. Al barar jeri, basar taýy qalmaǵan azamattar qaýipti baspanany panalaýǵa májbúr.
Súrilip jatqan úılerdiń keıbireýleri 1928 jyly salynǵan. Qazirgi ýaqytta tozyǵy jetken páterlerde ne sý, ne jylý joq. Apatty úı turǵyndary bul kúnder artta qalatynyna sener emes.
Jekemenshik qurylys kompanıanyń ókili Álıa Júsipovanyń aıtýynsha, aldaǵy jyly eki kópqabatty úı boı kóteredi. 117 páter qoldanysqa beriledi.
«Páter ıelerine ýaqytsha qonys usynyldy. Qurylys jumystary aıaqtalǵan soń burynǵy páterlerdiń aýmaǵyna sáıkes úı beriledi. Biz tek nysan qurylysyna jaýaptymyz. Al jergilikti atqarýshy organ ınjenerlik komýnıkasıalardy jelilerdi tartýǵa ýáde berip otyr. Bolashaqta bul shaǵyn aýdanda taǵy birneshe úı salmaqpyz. Avtoturaq, balalar ortalyǵy bolady dep josparlanǵan. Ázirge úıler súrilip jatyr. al qurylys bir aıdan soń bastalady», - deıdi Álıa Júsipova.
Jaýapty mekeme ókilderiniń habarlaıynsha, naqty josparlaý jobasy eki apta buryn bekitilgen. Aldaǵy ýaqytta 20 apatty úı buzylady. Jeti zamanaýı úı salynady. keshendi joba endi júzege asyrylyp jatyr. Qazirgi ýaqytta ınjenerlik komýnıkasıalardy tartýdy jobalap jatyr. Onyń aıasynda shaǵyn aýdan aýmaǵynda balalar shaǵyn ortalyǵy, oıyn alańdary qarastyrylǵan.