50 jyldan astam ýaqyt buryn «Kemel» shaǵyn aýdanyndaǵy Esentaı ózenniń boıyna salynǵan apatty kópirdi Almaty ákimi Erbolat Dosaev Jetisý aýdanynyń turǵyndarymen eseptik kezdesý jáne jumys sapary barysynda qarap shyqty, dp habarlaıdy Almaty-akshamy.kz
Jolymbet kóshesinde ornalasqan osy kópir boıynsha barlyq kólikterdiń qozǵalysy onyń aqaýly jaǵdaıyna baılanysty osy jyldyń mamyr aıynyń sońynda shektelgen. Ótken ǵasyrdyń 60-jyldarynda salynǵan kópir qurylymy eshqashan jóndelmegen jáne jaramsyz bolyp qalǵan. Kópir tirekterinde qaýipti jaryqtar paıda boldy, beton konstrýksıalary jartylaı buzyldy. Kópirdi kózben sholyp tekserý barysynda kópirge kireberisterde úıindilerdiń, sondaı-aq kópirdiń betkeılerindegi topyraqtyń shógýi anyqtaldy.
Qala basshysyna qalalyq mobıldilik basqarmasynyń basshysy Saǵyndyq Telibaevtyń aıtýynsha, kópirdi tehnıkalyq tekserý deformasıalyq tigistiń joqtyǵyn da anyqtady. Munyń bári qurylymnyń júk kótergishtigine jáne onyń beriktigine teris áser etedi. Demek, kópirdi jóndeý múmkin emes. Sondyqtan jańasyn salý qajet.
Jańa kópirdiń jobasy qadalar negizi bar bir aralyqty qurylysty, sondaı-aq kópirge kireberisterdiń júris bóligin qaıta qurýdy kózdeıdi. Jańa qurylym eskiden áldeqaıda úlken bolady. Sonymen, eger apattyq kópirdiń uzyndyǵy 16,8 metr, eni 8,5 metr jáne tirekterdiń bıiktigi 7 metr bolsa, onda jańa kópirdiń uzyndyǵy 24 metr, eni 13,5 metr, bıiktigi 9 metr bolady. Bul kópirden ótýdi jolmen bir deńgeıde qamtamasyz etýge múmkindik beredi.
Jaıaý júrginshilerdiń jaılylyǵy men qaýipsizdigin qamtamasyz etý úshin Erbolat Dosaev eki jaqtan da trotýarlardy jaılastyrýdy, sondaı – aq kópir «Kemel», «Kókjıek» shaǵyn aýdandary men «Qoıanqus», «Yntymaq», Jańadáýir, Jańatalap poselkeleri turǵyndary úshin kólik baılanysyn qamtamasyz etetindigin eskerip, qysqa merzimde jumystar júrgizýdi tapsyrdy.
«Bul áleýmettik mańyzy bar nysan, kópir arqyly birneshe avtobýs marshrýttary, sonyń ishinde mektep marshrýttary ótedi, sondyqtan barynsha qysqa merzimde jol qozǵalysynyń qamtamasyz etý kerek. Qajetti qarajat bólinetin bolady, qozǵalys osy jyldyń qazan aıynda ashylýy tıis. Kópir ondaǵan jyldar boıy adamdarǵa qyzmet etetindeı sapaly bolǵany jón», - dep atap ótti Erbolat Dosaev.
Qazirgi ýaqytta jańa kópir salý boıynsha jóndeý jumystary aıaqtalǵanǵa deıin avtokólik ıeleri atalǵan ýchaskeni Muhamedjan Seralın kóshesi arqyly aınalyp óte alady.