Elimizde aýrýhanalardyń qyzmetkerleri jylyna bir ret sottalmaǵandyǵy, sybaılas jemqorlyq faktileriniń joqtyǵy týraly anyqtama tapsyrýdan bosatyldy.
Budan bylaı bul anyqtamalardy tıisti vedomstvo biryńǵaı derekter bazasynan alýy máselesi qolǵa alyndy, dep habarlaıdy Almaty-akshamy.kz.
Bul týraly QR Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın Telegram arnasynda jazǵan.
«Azamattarmen sóılesý barysynda bir aýqymdy máselege kózim jetti. Másele mynadaı. Barlyq aýrýhanalardyń qyzmetkerleri jylyna bir ret sottalmaǵandyǵy týraly, sybaılas jemqorlyq faktileriniń joqtyǵy týraly jáne basqa da anyqtamalardy ákelýge májbúr bolady eken. Buny biryńǵaı derekter bazasynan alýǵa bolady. Osy jerde dereý sıfrlandyrýǵa jaýapty densaýlyq saqtaý vıse-mınıstrimen habarlasyp, erteń oblystyq jáne qalalyq densaýlyq saqtaý basqarmalaryna osy talaptardyń kúshin joıýdy talap etip, olardyń kadrlyq qyzmetterine, qajet bolǵan jaǵdaıda qyzmetkerlerdiń kelisimi boıynsha osy anyqtamalardy derekqordan suratýǵa múmkindik berýdi tapsyrdym», - deıdi mınıstr Astanadaǵy Saryarqa aýdanynyń Halyqqa qyzmet kórsetý ortalyǵyna barǵan sapary jaıly habarlamasynda.
Sondaı-aq, Baǵdat Mýsın onda kelýshilerge úıden shyqpaı-aq qandaı qyzmet túrlerin alýǵa bolatyndyǵy týraly aqparat bergenin atap ótken. «Atap aıtqanda, psıhonevrologıalyq, narkologıalyq, sottylyq bolýy nemese bolmaýyna qatysty, t.b anyqtamalardy eGov Mobile qosymshasy arqyly júkteı alady», - dep jazǵan ol.