Memleket basshysynyń jol salasyndaǵy jemqorlyqty joıý jónindegi tapsyrmasyn oryndaý maqsatynda Sybaılas jemqorlyqqa qarsy is-qımyl agenttigi men Kólik mınıstrligi birlesip jol qurylysy salasyndaǵy jemqorlyq táýekelderine syrtqy taldaý júrgizetin bolady6 dep habarlaıdy almaty-akshamy.kz.
Sybaılas jemqorlyqqa qarsy is-qımyl agenttiginiń Tóraǵasy Asqat Jumaǵalı men Kólik mınıstri Marat Qarabaev aǵymdaǵy jyldyń 10 maýsymynda ótken birlesken keńeste taldaý barysynda sheshilýi qajet ózekti máseleler men mindetterdi talqylady.
Sońǵy 3,5 jylda Sybaılas jemqorlyqqa qarsy qyzmet 64 jemqorlyq quqyq buzýshylyqty tirkep, 70 adamdy áshkereledi. Bul áreketterdiń saldarynan memleketke 8,8 mıllıard teńge zalal keltirildi, onyń ishinde 38 adam sottaldy. Negizgi qylmystar paraqorlyq, jymqyrý jáne laýazymdyq ókilettikterdi teris paıdalaný faktilerimen baılanysty.
Asqat Jumaǵalıdiń aıtýynsha, "Jol jumystary sapasynyń tómendigi qurylystyń barlyq kezeńderinde, sonyń ishinde búdjettik josparlaý, jobalaý, smetalyq josparlaý, jobalyq-smetalyq qujattamanyń memlekettik saraptamasy, tehnıkalyq qadaǵalaý, qabyldaý jáne paıdalanýdy baqylaý kezeńderinde júıeli jemqorlyq táýekelderimen baılanysty."
Memleket basshysynyń tapsyrmalary aıasynda jol salasyna bólingen barlyq qarajatty josparlaý jáne jumsaý úderisteri muqıat zerdelenetin bolady. Sondaı-aq, jol qurylysynyń halyqaralyq tájirıbesi, atap aıtqanda, Gonkong, Sıngapýr jáne Qytaı elderiniń tájirıbesi taldanady. Taldaý nátıjeleri boıynsha jol qurylysynyń barlyq kezeńderinde jemqorlyq táýekelderin joıý jáne aldyn alý sharalary qabyldanady. Ǵylymı qaýymdastyqpen birlesip qurylystyń jańa tehnologıalaryn engizý tetikteri ázirlenip, usynylatyn bolady.
Kezdesý qorytyndysy boıynsha taraptar jol qurylysy salasyndaǵy jaǵdaıdy jaqsartý boıynsha keshendi sharalardy belgiledi.