Bul týraly Agenttik Tóraǵasy Asqat Jumaǵalı málimdedi.
6 aıdyń qorytyndysy boıynsha alqa otyrysynda ol sybaılas jemqorlyqqa qarsy is-qımyl kezinde Jemqorlyq táýekelderiniń kartasy qoldanylatynyn aıtty, dep habarlaıdy Almaty-akshamy.kz.
Bul ádispen bilim berý salasynda syrtqy taldaýlar júrgizilip, jemqorlyqqa jaǵdaı jasaıtyn júıeli problemalar belgilengen. Sonyń arqasynda saladaǵy tutas qylmystyq sqemalar ashyldy. Almaty, Shymkent jáne Taldyqorǵan qalalarynyń, Qyzylorda men Aqtóbe oblystarynyń bilim berý salasyndaǵy laýazymdy tulǵalaryna qatysty qylmystyq ister tergelip jatyr. Agenttiktiń dereginshe, mektep dırektorlary men esepshileri búdjet qarajatyn jymqyrǵan degen kúdikke ilindi.
Qazir el boıynsha bilim berý salasynda 102 qylmystyq is tirkelgen. Aldyn ala málimetke saı shyǵyn kólemi 8 mlrd teńgege jýyqtaıdy. Jalpy taldaý nátıjelerine saı ártúrli salalarda jemqorlyq táýekelderin joıý boıynsha 1100-den astam usynys ázirlendi. Olardyń 33%-yn memlekettik organdar oryndady.