Prezıdent Májilis tóraǵasy Erlan Qoshanovty qabyldady.
Memleket basshysyna Parlamenttiń tómengi palatasynyń VIII shaqyrylymynyń I sesıasy aıasyndaǵy qyzmeti týraly málimet berildi, dep habarlaıdy Almaty-akshamy.kz Aqordaǵa silteme jasap.
Sesıa bastalǵannan beri májilismenderdiń qaraýynda bolǵan 82 zań jobasynyń 20-na depýtattar bastamashylyq jasady.
Olardyń ishinde Zańsyz ıemdenilgen aktıvterdi qaıtarý, Onlaın-platformalar jáne onlaın-jarnama, Semeı ıadrolyq qaýipsizdik aımaǵy, suıytylǵan gaz aınalymy, elektrli samokattardyń qozǵalysyn retteý týraly jáne basqa da zańdar bar.
Májilis spıkeri konstıtýsıalyq reformanyń qorytyndysy boıynsha palatanyń jumys formatyna engizilgen ózgerister jóninde aıtty.
Májilistiń 6 partıalyq fraksıadan, sondaı-aq bir mandatty depýtattardan jasaqtalýy zań shyǵarý jumysynyń ashyqtyǵyn arttyryp, saılaýshylarmen keri baılanysty kúsheıtti.
Olar Úkimet múshelerine joldaǵan depýtattyq saýaldarynda azamattardyń ózekti máselelerin kóbirek kótere bastady.
Ótken sesıa barysynda alǵash ret jylýmen qamtamasyz etý salasyndaǵy basqarýǵa qatysty Joǵary aýdıtorlyq palatanyń esebi tyńdaldy jáne atalǵan salada keshendi problemalar bar ekeni anyqtaldy.
Depýtattar qoǵamdaǵy, sonyń ishinde óńirlerge jasaǵan saparlary kezinde jınaqtaǵan problemalar boıynsha jaýapty mınıstrlikter basshylyǵynyń aldyna birqatar naqty másele qoıdy.
Jylý elektr ortalyqtaryn jáne jylýmen qamtamasyz etý jelilerin jańǵyrtýǵa erekshe nazar aýdaryldy.
Qazirgi tańda májilismender óńirlerde halyqpen kezdesýler ótkizip jatyr.
Sapar barysynda Májilistiń kelesi sesıasynda qaralatyn Sý, Búdjet, Salyq jáne Qala qurylysy kodeksteriniń jobalary boıynshatalqylaýlar uıymdastyrylyp, usynystar jınaqtalady.
Sonymen qatar Erlan Qoshanov parlamenttik dıplomatıa aıasynda atqarylǵan jumystardyń qorytyndysy týraly aıtty.
Sesıa bastalǵannan beri Ázerbaıjan, Belarýs, Qyrǵyzstan, Reseı, Túrkıa, Ózbekstan parlamentteriniń basshylarymen jáne basqa da elderdiń zań shyǵarýshy organdarynyń ókilderimen kezdesýler ótkizilgen.