Almaty qalasy "Shańyraq" yqshamaýdany "Shattyq" balabaqshasynyń tárbıeshisi Rımma Aralbaıqyzy ana týraly oıymen bólisedi.
– Janymyzda júrgen jaqyn adamdardyń tiri kúninde keıde qadirin bilmeı jatamyz. Erkesh degen ánshiniń bir suhbatynyń esime oralyp otyrǵany. Ol anasy es bilmeıtin shaǵynda qaıtys bolyp, ájesiniń baýyrynda ósken jigit eken.
Keıin mektep bitirip, oqýǵa túsedi. Jataqhanada uıyqtap jatqanda, bólmeles bozbalanyń telefony úzdiksiz shyryldap qoımaıdy. Biraq kýrstasy uıyqtaı beredi. Erkesh moınyn sozyp qarasa, telefonnyń betinen "Mama" degen jazýdy kóredi. Sonda júreginiń aýyrǵanyn aıtady ánshi.
Meniń anam qyryq jasynda dúnıe saldy. Jas ketti. Tórt bala qaldyq, úıdiń úlkeni men, kishimiz nebary bir jarym jasta bolatyn.
Sheshem qatty aýyryp júrse de, bizge bildirtpeı tik qalpynda júre beripti. Bálkim jumysbasty ákemniń qyzmetine syzat, al bizdiń qabaǵymyzǵa kóleńke túsirgisi kelmegeni bolar, áıteýir ortamyzdan máńgige ketip qalady dep óz basym múldem oılamappyn.
Tipti "ydys-aıaqty jýyp tastarsyń" nemese "Sińlińdi sýǵa túsirý kerek edi" degende, "mama, óziń isteı salshy, men sabaǵyma daıyndalýym kerek" dep burtıǵan sátterimdi qazir oılasam, ózegimdi ókinish tyrnalaıdy. Sol sátter qaıta kelse ǵoı deımin.
Bizdi jetpiske kelgen ájem baqty. Jetkizdi. Aýzymyzǵa bar táttisin saldy. Sháı ústinde ájem birde bizge kózi jasaýrap otyryp:
"Ýaqyt – emshi, sender de jetilip, adam qataryna qosylarsyńdar. Men tiri turǵanda eshkimnen jamandyq kórmeısińder. Degenmen, bul dúnıede týǵan shesheniń "Aınalaıyn!" degenine ne teń keler?!" degeni esimde qalypty. Sol sózdiń astaryn endi túsinip júrmin.
Ózim de anamyn, tórt balam bar. Bar jaqsyny sol balapandaryma berýge tyrysamyn. Janyma jalaý bolyp júrgen jan jarym bar. Biraq keıde jabyrqap qalatyn sátterimniń bolatynyn jasyrmaımyn. Sebebi, óz anańnyń tiri júrgenin, qyzyq-qýanyshyńa ortaqtasyp otyrǵanyn qalaıdy ekensiń. Bir kúlimdep qaraǵan sátin ańsaısyń.
Úıdi jylylyqqa toltyryp turatyn analardyń qadirin bileıik degim keledi.