JÚREK
Emhanada.
– Anashym, qazir siz de kirińizshi ýkolǵa menimen birge, – dedi ulym Oljas.
– Uıat qoı, balam. Dáý jigitsiń, kezekte turǵan basqa balalar da, mamalar da kúlmesin saǵan dep júrmin ǵoı.
– Ýkol degen jama-a-n ashshy ǵoı. Al siz qasymda tursańyz, dym aýyrmas edi...
Ananyń súıgen jeri otqa kúımeıdi, oq ta tımeıdi!
JYLYLYQ
– Túý, nege kele beresińder munda?! Men maqala jazyp otyrmyn ǵoı, kóńilim qaıta-qaıta bólinip ketip jatyr. Bólme kóp qoı osy úıde, sol jaqta oınańdar. Ne bar munda senderge?!
– Ol bólmelerde qyzyq emes, munda siz bar, – degen Oljastyń jaýaby júregimdi eljiretip jiberdi.
TÚN
– Oljas, sen túnimen kórpeńdi qaıta-qaıta ashyp tastaı berdiń. Ylǵı solaısyń. Áne, endi murnyń pyshyldap, aýyraıyn dep otyrsyń. Al Shuǵyla she, bar-joǵy eki-aq ret ashyp tastady kórpesin, sen sıaqty emes, tynysh uıyqtaıdy, – dedim.
– Anashym, sonda siz ne, múldem uıyqtamaısyz ba, túnimen Oljas ekeýmizge qara-a-ap otyrasyz ba? – degeni Shuǵylanyń.
Iá, analar uıyqtamaıdy.
ALAQAN
Ulym daladan qara terge malshynyp, shashynyń arasynan sýy monshaqtap kirip keldi. Fýtbol oınapty. Sý surady.
Aıaǵyn, bashpaılarynyń arasyna deıin salqyn sýmen jýyp jatyr edim, «Ýh, raqat-aı! Qolyńyz sondaı jumsaq!» – dedi.
– Bizdiń mamanyń alaqany kúshti-i ǵoı! – dep qostaı ketti Shuǵylam.
– Balam, meniń ǵana emes, barlyq ananyń alaqany jumsaq bolady, – dedim. Ras qoı.