Almaty qalasy boıynsha Qylmystyq-atqarý júıesi departamentine qarasty №11 mekemesinde, ıaǵnı kámeletke tolmaǵan jazasyn óteýshi balalar kolonıasynda «Anaǵa qurmet» mýzeıi ókilderiniń uıymdastyrýymen kórme ótti.
Sonymen qatar, Táýelsiz Qazaqstannyń tarıhyndaǵy tuńǵysh general-áıel Sáýle Aıtbaeva dáris ótkizdi. Sáýle Muhanbedıanqyzy 2017-2022 jyldary Senat depýtaty, 2018-2019 jyldary Qazaqstan Respýblıkasynyń bala quqyqtary jónindegi ýákili bolǵan. Qazir qurmetti eńbek demalysynda. №11 mekemeniń kitaphanasyna Qazaqstan Konstıtýsıasynyń avtory Naǵashybaı Sháıkenov týraly «Ónegeli ómir» kitabyn syıǵa tartty
Almaty qalasyndaǵy «Anaǵa qurmet» mýzeıi – elimizdegi eń erkeshe mýzeı. Qyzmetkerleri balalar kórsin dep, ózderimen birge kóne jádigerlerdi, analarymyz paıdalanǵan burynǵy ydystardy, erte zamandaǵy batyrlar qarý-jaraqtaryn jáne basqa da qundy eksponatttardy ala kelip, keremet kórme usyndy. Balalar kóne jádigerlerdi qolymen ustap, ózderin mýzeıge baryp qaıtqandaı áserde bolǵany anyq.
Mýzeı meńgerýshisi Gúlnar Ábish jazaly jasóspirimderge bos ýaqyttarynda qolónermen aınalysýǵa, mekemeden bosap shyqqan soń osyndaı erkeshe jumystar jasap, adal eńbegi arqyly qoǵamnan óz ornyn taýyp, óz-ózin jumyspen qamtı alatyndaryn atap ótti.
– Osyndaı tanymdyq is-sharalar jasóspirimderdiń estetıkalyq talǵamyn arttyryp, tarıhymyz týraly kóbirek bilýge, qurmetteýge úndeıtini sózsiz. Sondyqtan bizdiń maqsat – jazaly jetkinshekter úshin osyndaı júzdesýlerdi jıi uıymdastyryp, olarǵa ómirdiń mánin túsindirý, jaman jolǵa túsip ketpeı, ózine, otbasyna, qoǵamǵa paıdaly ispen aınalysýyna bolatyn joldardy kórsetý, – deıdi №11 mekeme bastyǵy ádilet polkovnıgi Almat Súleımenov.