Almaty qalasyndaǵy Qazaqstan Respýblıkasynyń Ulttyq ulany 3650 áskerı bóliminde jas sarbazdardyń saltanatty túrde ant qabyldaý rásimi ótti.
Otan úshin otqa túser azamattarymyzdyń ómirindegi jaýapty qadam jasaý is-sharasyna «Ońtústik» óńirlik qolbasshylyǵy qolbasshysynyń tehnıka jáne qarý-jaraq jónindegi orynbasary polkovnık Igor Popovskıı jáne bólimniń áskerı qyzmetshileri, sondaı-aq sarbazdardyń ata-analary men týǵan-týystary qatysty.
Jetisý oblysynan shaqyrylǵan 40-qa jýyq jaýynger Qazaqstan halqyna adal bolýǵa, onyń zańdary men ulttyq qundylyqtaryn qasterlep saqtaýǵa ant berdi.
– Ulymnyń Otan aldyndaǵy áskerı ant qabyldaý is-sharasyn kózimizben kórip, nege qýanbasqa?! Qarap tursam, balamnyń jaǵdaıy jaqsy eken. Keshe ǵana aýyldan shyǵaryp salǵan bozbala edi. Búgin sapta symdaı tartylyp, eseıip qalǵandaı. Biz úshin onyń amandyq-saýlyǵy, Otan aldynda atqarǵan qyzmeti mańyzǵa ıe. Sondyqtan da onyń áskerı ant qabyldaý sharasyn kórip, kóńil marqaıtý úshin arnaıy kelip otyrmyn, – deıdi Jetisý oblysynan áskerge shaqyrylǵan qatardaǵy Aqylbek Dáribaıdyń anasy Dámeli Sabyrhanqyzy.
Saltanatty jıynda áskerı mýzykanyń áýenimen qatar-qatar sap túzep, bir aı boıy úırengen san alýan áskerı qımyldaryn kórsetken sarbazdardyń eptiligi men sheberligine jınalǵan qaýym úlken qoshemet bildirdi.