Almatydaǵy Jambyl atyndaǵy Qazaq memlekettik akademıalyq fılarmonıasynyń úlken zalynda Qazaqstannyń Memlekettik jáne qoǵam qaıratkeri Jeksembek Erkimbekovtyń 95 jyldyǵyna arnalǵan saltanatty kesh ótti. Bul sharany Qazaqstannyń eńbek sińirgen qaıratkeri, kompozıtor jáne pıanıs Serik Erkimbekov óziniń «Otanym» atty avtorlyq konsertimen belgiledi. Bul týraly Aqshamnews.kz saıty habarlaıdy.
Jeksembek Erkimbekov 1966-1987 jyldary Qazaqstannyń Mádenıet mınıstrliginde basshylyq qyzmetter atqaryp, 10 jyldan astam ýaqyt mınıstr bolǵan. Onyń basshylyǵy kezinde Almaty qalasynda 200-ge jýyq mádenıet mekemeleri men ǵımarattar boı kóterip, el mádenıetiniń damýyna erekshe úles qosyldy.
Keshte Memlekettik sımfonıalyq orkestr men B.Baıqadamov atyndaǵy Memlekettik hor kapelasy dırıjerler Qanat Omarov pen Beıimbet Demeýovtyń jetekshiligimen óner kórsetti. Sondaı-aq Qazaqstannyń eńbek sińirgen qaıratkerleri Talǵat Musabaev, Meıir Baınesh, «Daryn» memlekettik syılyǵynyń laýreaty Asqar Muqıat, Parıjdegi halyqaralyq baıqaýdyń jeńimpazy Nurgúl Núsipjan jáne ózge de talantty ónerpazdar konserttiń kórkin ashty.
Baǵdarlama barysynda Serik Erkimbekovtyń «Shákárim» sımfonıasy, «Máńgilik alaý» baletinen prolog jáne ózge de shyǵarmalary oryndaldy. Kórermender bul shyǵarmalardy jyly qabyldap, fılarmonıa ujymynyń ónerine joǵary baǵa berdi.
Kompozıtor Serik Erkimbekov óz sózinde bul keshtiń erekshe mańyzdylyǵyn atap ótti:
– «Bul konsert meniń ákem – memlekettik jáne qoǵam qaıratkeri Jeksembek Erkimbekovtyń 95 jyldyǵyna arnaldy. Ákemniń el mádenıetin damytýdaǵy eńbegi ushan-teńiz. Búgingi konsertte ákemniń zamandastary men óner salasyndaǵy belgili tulǵalar jınaldy. Biz bul sharaǵa bir jyldan astam ýaqyt daıyndaldyq jáne kórermenniń ystyq yqylasyn sezindik», – dedi ol.
Teatrtanýshy jáne ónertaný kandıdaty Amangeldi Muqan Jeksembek Erkimbekovtyń qazaq mádenıetine qosqan úlesin erekshe atap ótti:
– «Jeksembek Erkimbekov – qazaq mádenıeti men óneriniń janashyry. Ol 80-90 jyldary Respýblıka saraıy, teatrlar jáne ózge de mádenı nysandardyń salynýyna erekshe eńbek sińirgen tulǵa. Onyń kásibı jáne dástúrli ónerdi damytýdaǵy úlesi ólsheýsiz», – dedi ol.
Keshte Jeksembek Erkimbekovtyń zamandastary, otbasy músheleri men áriptesteri de boldy. Olardyń qatysýy qaıratkerdiń el tarıhyndaǵy mańyzdylyǵyn taǵy da aıqyndaı tústi. Bul kesh Jeksembek Erkimbekovtyń qazaq mádenıetiniń damýyna qosqan súbeli úlesin eske salyp, onyń esimin óner áleminde jańǵyrtty.