· Almatyda ata-ana qamqorlyǵynsyz qalǵan balalardy qoldap, qorǵaýǵa baǵyttalǵan bastamalar qarqyndy damyp keledi.
Óńirlik komýnıkasıalar qyzmeti alańynda ótken brıfıńte «Ulttyq bala asyrap alý agenttigi» jobasynyń jetekshisi Farıda Rahmetova Kásibı qabyldaýshy otbasy ınstıtýtyn engizýge arnalǵan jańa zań jobasynyń mańyzdylyǵy týraly aıtty.
Ulttyq bala asyrap alý agenttigi – bul elimizde bala asyrap alý mádenıetin damytýǵa jáne kásibı qabyldaýshy otbasylardy qoldaýǵa segiz jyldan beri eńbek etip kele jatqan «Ana úıi» qorynyń mańyzdy bóligi. Qazirgi ýaqytta elimizde 20 keńes berý kabıneti jumys isteıdi, onda qor mamandary jetim balalardy otbasyna qabyldaǵysy keletin azamattarǵa kómek kórsetedi. Tek Almatynyń ózinde osy joba iske qosylǵannan beri 2 285 adam mamandardan keńes alyp, al 818 azamat Qabyldaýshy ata-analar mektebinde daıyndyqtan ótti. Osy baǵdarlamanyń nátıjesinde 105 almatylyq otbasy 158 jetim balany qanatynyń astyna aldy.
«On eki jyl ishinde ınternattyq mekemelerdegi balalar sany 10 myńnan 4 myńǵa deıin qysqardy. Alaıda, keıingi bes jylda bul kórsetkish ózgerissiz qalyp otyr. Buǵan basty sebep – jetim qalǵan balalardyń kóbi jasóspirimder, erekshe qajettilikteri bar balalar nemese jalǵyz emes, baýyrlary bar. Mundaı balalardy bala asyrap alýǵa nıetti otbasylarǵa ornalastyrý qıynyraq», – deıdi «Ana úıi» qorynyń psıholog qyzmetiniń jetekshisi Laýra Aqataeva.
Osyndaı máseleni sheshý úshin Kásibı qabyldaýshy otbasy ınstıtýtyn engizetin zań jobasy ázirlengen bolatyn. Qujat «Neke jáne otbasy týraly» Kodekske resmı túrde engizildi.
· Taqyrypqa oraı
Farıda RAHMETOVA, «Ulttyq bala asyrap alý agenttigi» jobasynyń jetekshisi:
Ata-analar tereńdetilgen daıarlyqtan ótedi
2016 jyldan beri jumys istep kele jatqan «Ulttyq asyrap alý agenttigi» kásibı qabyldaýshy otbasylardy engizýge erekshe nazar aýdaryp keledi. Bul – jańa format. Dástúrli qabyldaýshy otbasylardan aıyrmashylyǵy, fosterlik ata-analar tereńdetilgen daıarlyqtan ótip, kásibı deńgeıde jumys isteıdi. Olardyń qyzmeti jańa zańnamamen retteledi jáne memleket tarapynan qarjylaı qoldaý kórsetý qarastyrylǵan. Sonymen qatar, bul júıe qorǵanshylyq jáne qamqorshylyq organdary tarapynan turaqty baqylaýdy kózdeıdi. Ata-analar ár jarty jyl saıyn balanyń densaýlyǵy men damýy týraly esep berýge mindetteledi, al mamandar bul otbasylarmen tyǵyz jumys isteýdi jalǵastyrady.