Soǵys ardageri Zulqarnaı Seıitov bıyl Jeńistiń 80 jyldyq mereıtoıyn qarsy alady.
Kóktem shyǵa qart maıdanger 9-mamyrdy asyǵa kútedi. Ol úshin bul kúnnen artyǵy joq. Jeńis kúnin Berlınde qarsy alǵan, dep habarlaıdy aqshamnews.kz 24.kz-ke silteme jasap.
Sol kezdiń árbir sáti álige deıin kóz aldynda.
«Ony umytý múmkin emes. Sodan beri talaı baqytty shaqty bastan ótkerdim. Biraq «soǵys bitti»-degen jalǵyz aýyz sózdi estigendegi qýanyshty aıtyp jetkizý múmkin emes», - deıdi qarıa.
Ardaqty ardager qazir Almatyda turady. 1941 jyly Zulqarnaı Seıitov 9-synypty endi bitirgen edi. Sol jyldyń qarashasynda mektepti aıaqtamaı ózi suranyp, maıdanǵa attanady. Aldymen jas jaýynger tank joıýdyń ádisin oqyp kýrstan ótedi. Qarý ustap, ıisshil ıttermen jumys jasaýdy úırenedi. Keıin maıdan dalasyna jiberiledi. Lenıngrad, Stalıngrad qalalaryn azat etýge qatysady. Áskerdiń jolyn jarylǵysh zattan tazalap Berlınge deıin barǵan. Ondaǵy Potsdam qalasyn mınadan tazartýǵa qatysty.
Soǵys aıaqtalǵan soń Zulqarnaı Seıitov mektep partasyna qaıta otyryp, oqýyn támamdaıdy. Ombydaǵy aýyl sharýashylyǵy ınstıtýtyna túsedi. Ony bitirgen soń ǵylymmen aınalysady. Almatydaǵy qazirgi agrarlyq jáne medısına ýnıversıtetterinde bıohımıadan sabaq beredi. Bıologıa ǵylymdarynyń doktory 96 jasqa kelgenshe dáris oqýyn toqtatpaǵan. Ol 150-den astam ǵylymı jumys pen monografıanyń, 10 oqý quralynyń avtory. Eńbegi elenip, talaı marapatqa ıe boldy. Uly Talǵattyń aıtýynsha, ákesiniń uzaq jasaýynyń syry da osy tynymsyz eńbektiń nátıjesi.
Talǵat Seıitov, Zulqarnaı Seıitovtiń uly:
- Byltyr jeltoqsannyń 27-de ákem 102-ge toldy. Bıyl 103-ke aıaq basty. Men es bilgeli ákemniń demalǵanyn kórgen joqpyn. Úıge kelgen soń da jumys istep otyratyn. Oqýdan sharshamaıtyn. 100-ge kelgenshe ózi júrip-turyp eshkimge salmaǵyn salǵan joq. Aıaǵy aýyryp, júrýi qıyndaǵan kezde ǵana dáris oqýyn toqtatty. Súıegi asyl dep osyndaı kisilerdi aıtatyn shyǵar. Qazir qulaǵy aýyr estıdi. Biraq ne suraǵanyńyzdy túsinse jaqsylap turyp aıtyp beredi. Ony ózińiz de kórdińiz.
Ardager ǵylymmen aınalysqanda alǵan marapattarym bir bólek, al soǵys jyldary taqqan orden-medaldarymnyń orny tipten ózgeshe,-deıdi. Qart maıdangerdiń «Qyzyl Juldyz», II dárejeli «Otan soǵysy» ordenderi jáne «Stalıngradty qorǵaǵany úshin», «Erligi úshin» medaldary taǵylǵan kostúmi únemi qasynda ilýli turady. Soǵan qarap sol bir zulmat jyldardy, týǵan jerge oralmaǵan qarýlas dostaryn muńaıa eske alady.